ဧရာဝတီတိုင်း၊ အင်္ဂပူမြို့နယ်ထဲက ရဲတပ်သားတယောက်ဟာ ကရင်ပြည်နယ်ထဲက PDF စစ်ဒေသ အမှတ် ၂ မှာရှိတဲ့ ကျားဖြူတပ်ဖွဲ့မှာ လာရောက်ခိုလှုံခဲ့တယ်လို့ သတင်းထုတ်ပြန်ထားပါတယ်။

ရွှေတောင်နယ်မြေရဲစခန်းက ရဲတပ်သား မြင့်အောင်ဟာ စစ်ကောင်စီကို အာဏာဖီဆန် CDM ပြုလုပ်ပြီး ဇွန် ၃ ရက်ကစတင်ကာ Justice Soldiers PDF အဖွဲ့ကို ဆက်သွယ်ပြီး လာရောက်ခိုလှုံခဲ့တာလို့ ဆိုပါတယ်။

“သူက ခွင့်မဲ့ပျက်ကွက်ဖြစ်နေတာ မေလပိုင်းကတည်းက။ ဒီနေ့မှာ သတင်းက ထွက်လာတာ ပျက်ကွက်ဖြစ်နေတာကြာပါပြီ”လို့ ရဲတပ်ဖွဲ့နဲ့နီးစပ်သူတယောက်က  ပြောပါတယ်။

အသက် ၂၈ နှစ်အရွယ် ရဲတပ်သားမြင့်အောင်ဟာ ရဲတပ်ဖွဲ့လုပ်သက် ၅ နှစ်ကျော်ရှိသူဖြစ်ပြီး ရဲတပ်ရင်းမှာ ၂ နှစ်ကြာ တာဝန်ထမ်းဆောင်ခဲ့တဲ့သူလည်း ဖြစ်ပါတယ်။

Justice Soldiers PDF အဖွဲ့ကတော့ သူ့ကို လွတ်မြောက်နယ်မြေတနေရာကို ပို့ဆောင်ထားပြီး ထိုင်းဘတ်ငွေ ၂၀၀၀ ထောက်ပံ့ပေးထားတယ်လို့ သတင်းထုတ်ပြန်ထားပါတယ်။