မကွေးတိုင်း၊ ပခုက္ကူမြို့ရှိ စစ်ကောင်စီတပ်တခုရဲ့ ဂိတ်ပေါက်ဝမှာ မေ ၂၉ ရက်ညက ကင်းစောင့်နေတဲ့ စစ်သားတွေ အရက်မူးပြီး အိပ်ပျော်နေလို့ MA1 သေနတ်တလက်ကို မြစ်ခြေ-ကျွန်းချောင်း ပြည်သူ့ကာကွယ်ရေးတပ်ဖွဲ့ MC-KC PDF က ကောက်ယူခဲ့တယ်လို့ MC-KC PDF ပြန်ကြားရေးတာဝန်ခံ G3 က ဒီဗွီဘီကို ပြောပါတယ်။
“စစ်(...) နှစ်ကောင်က စစ်တပ်ဝင်ပေါက်ဝက ဂိတ်မှာ အရက်မူးပြီး အိပ်ပျော်နေတာ။ သူတို့ကို သတိထားပြီး စောင့်ကြည့်နေခဲ့တာဗျ။ အဲဒီမှာ သေနတ်နဲ့လည်း ဝေးနေလို့ ကျနော်တို့ဆီက ရဲဘော်တွေ လမ်းကြုံတာနဲ့ MA1 သေနတ်တလက်၊ ကျည်ဆန် ၇ တောင့်နဲ့ ကျည်အိမ်တခု ကောက်ယူရရှိခဲ့တာဗျ။ သေနတ်ယူလို့ မလွယ်ကူမှာစိုးလို့ သူတို့ကိုတော့ ဘာမှမလုပ်ခဲ့ဘူး။”
ပခုက္ကူမြို့နယ် မြစ်ခြေ-စဘေလမ်းပိုင်းမှာ မေ ၂၈ ရက် ညနေပိုင်းကလည်း စစ်ကောင်စီစစ်ကြောင်းကို မြစ်ခြေ-ကျွန်းချောင်း ပြည်သူ့ကာကွယ်ရေးတပ်ဖွဲ့ MC-KC PDF က မိုင်းဆွဲတိုက်ခိုက်ခဲ့လို့ စစ်ကောင်စီတပ်သား ၇ ယောက် သေဆုံးကာ အများအပြား ဒဏ်ရာရရှိခဲ့တယ်လို့ MC-KC PDF ကနေ သိရပါတယ်။
