သပိတ်ကျင်းရဲစခန်း ဒရုန်းဖြင့် ဗုံးချတိုက်ခိုက်ခံရ
DVB
·
May 17, 2022
မန္တလေးတိုင်း၊ သပိတ်ကျင်းမြို့နယ်၊ ဆိပ်ကမ်းရပ်ကွက်ရှိ သပိတ်ကျင်းမြို့မရဲစခန်းမှာ မေလ ၁၇ ရက် မနက် ၉ နာရီလောက်က ဒရုန်းနဲ့ ဗုံးချပြီး ဖောက်ခွဲခံခဲ့ရပါတယ်။
ဗုံး ၂ လုံး ပစ်ချဖောက်ခွဲခံရတာဖြစ်ပြီး ရဲစခန်းဝင်းအတွင်း ဗုံး ၁ လုံးကျ ပေါက်ကွဲခဲ့ကာ ပျက်စီး ဆုံးရှုံးတာ မရှိဘူးလို့ ရဲတပ်ဖွဲ့နဲ့ နီးစပ်သူတဦးက ပြောပါတယ်။
ကျန်ဗုံးတလုံးမှာလည်း ရဲစခန်းဝင်းအတွင်းရှိ မြို့နယ်မြန်မာ့စီးပွားရေးဘဏ်ငွေတိုက်နံဘေး ကျခဲ့ပေမဲ့ ပေါက်ကွဲတာမရှိခဲ့ဘူးလို့ ဆိုပါတယ်။
ဒါ့အပြင် ဆိပ်ကမ်းရပ်ကွက်၊ ကမ်းနားလမ်းရှိ နေအိမ်တခုပေါ်မှာလည်း ဗုံးတလုံးကျကာ ပေါက်ကွဲခဲ့ပြီး သွပ်မိုး၊ မျက်နှာကြက် အနည်းငယ်ထိခိုက်ပျက်စီးပေမယ့် လူထိခိုက်တာ မရှိဘူးလို့ သိရပါတယ်။
ဒရုန်းနဲ့ ဗုံးခွဲတိုက်ခိုက်မှုတွေကို ဘယ်အဖွဲ့က လုပ်ဆောင်တယ်ဆိုတာတော့ မသိရသေးပါဘူး။
