မြန်မာနယ်စပ်၊ ထိုင်းနိုင်ငံ၊ တာ့ခ်ခရိုင်၊ တာဆောင်ယမ်းမြို့နယ်မှာ ထိုင်းနိုင်ငံကို တရားမဝင် ဝင်လာတဲ့ ရွှေ့ပြောင်းမြန်မာအလုပ်သမား ၃၄ ဦး၊ လူကုန်ကူးသူ ထိုင်းလူမျိုး ၃ ဦးနဲ့ မော်တော်ယာဉ် ၄ စီးကို ဧပြီ ၂၂ ရက်က ဖမ်းဆီးရမိတယ်လို့ ထိုင်းစစ်တပ်သတင်းရင်းအမြစ်က ဆိုပါတယ်။
ရွှေ့ပြောင်းမြန်မာအလုပ်သမားတွေဟာ ထိုင်းနိုင်ငံမှာ အလုပ်လုပ်ဖို့အတွက် တယောက်ကို ဘတ်ငွေ ၂၀,၀၀၀ ကနေ ၂၃,၀၀၀ အထိ ပေးရတာပါ။
အဲဒီရွှေ့ပြောင်းအလုပ်သမားတွေဟာ မြန်မာ-ထိုင်းနယ်စပ် ကရင်ပြည်နယ် ဘားအံခရိုင် မဲ့တရေ့ကျေးရွာကနေ စက်လှေနဲ့ ထိုင်းနိုင်ငံဘက် ကူးပြီးနောက် တာဆောင်ယမ်းမြို့နယ် တကိုခီးရွာ ရပ်ကွက် ၇ ကို ရောက်နေစဉ် သတင်းပေါက်ကြားတာကြောင့် ထိုင်းစစ်တပ်နဲ့ တခြားအဖွဲ့တွေက လမ်းခရီးကနေ စောင့်ဖမ်းခဲ့တာပါ။
ဒါ့အပြင် နောက်ထပ် ကားနှစ်စီး ထပ်ရောက်လာတဲ့အတွက် ထိုင်းတာဝန်ရှိသူတွေက စစ်ဆေးရာ တရားမဝင် လူကုန်ကူးတာကို တွေ့ရှိတဲ့အတွက် ထပ်မံဖမ်းဆီးခဲ့ပါတယ်။
ထိုင်းနိုင်ငံအတွင်း တရားမဝင် ဝင်ရောက်တဲ့ မြန်မာနိုင်ငံသား အမျိုးသား ၁၆ ဦး၊ အမျိုးသမီး ၁၈ ဦး၊ ထိုင်းလူကုန်ကူးသူ ၃ ဦးနဲ့ မော်တော်ယာဉ် ၄ စီးကို ထိုင်းနိုင်ငံ တရားဥပဒေအတိုင်း အရေးယူနိုင်ရေးအတွက် တာ့ခ်ခရိုင် တာဆောင်ယမ်း မြို့မရဲစခန်းကို လွှဲပြောင်းပေးအပ်ထားပါတယ်။
