ရှမ်းပြည်နယ်တောင်ပိုင်း၊ ဓနုကိုယ်ပိုင်အုပ်ချုပ်ခွင့်ရဒေသ ရွာငံမြို့နယ် လွှစင်ရွာနဲ့ တောင်ပို့ကွဲရွာ အကြားမှာ ဧပြီလ ၉ ရက် ဉနေ ၄ နာရီလောက်က စစ်ကောင်စီတပ်နဲ့ ဒေသကာကွယ်ရေး တပ်ဖွဲ့ တို့ကြားတိုက်ပွဲဖြစ်ခဲ့ပြီး စစ်ကောင်စီတပ်ဘက်က ဗိုလ်မှူး ၁ ယောက်အပါအဝင် ၄ ယောက် သေဆုံးသွားပါတယ်။
ဒေသခံ မဟာမိတ်ပူးပေါင်းတပ်ဖွဲ့တွေက ပျူစောထီးခေါင်းဆောင် ဦးဝင်းမြင့်နဲ့ အဖွဲ့ကို တိုက်ခိုက်ဖို့ စောင့်ဆိုင်းနေစဉ် တောင်ကြီး - ရွာငံ - မန္တလေး ပြေးဆွဲနေတဲ့ (ရွှေဓနုကားဖြင့် ) ရောက်ရှိလာတဲ့ စစ်ကောင်စီတပ်စီတပ်တွေကို ပြောက်ကျားတပ်တွေက တိုက်ခိုက်ခဲ့တာလို့ TPDF ခေါင်းဆောင်ကပြောပါတယ်။
စစ်ကောင်စီတပ်သားတွေကို တင်ဆောင်လာတဲ့ ကားတစ်စီး ပျက်စီးသွားပြီး ဗိုလ်မှူအပါအဝင် စစ်ကောင်စီတပ်သား ၄ ဦးသေဆုံးသွားပြီး ထိခိုက်ဒဏ်ရာရတဲ့ သူတွေ ရှိတယ်လို့လည်း ပြောပါတယ်။
"ပျူစောထီးတွေကို ရှင်းဖို့ ကျနော်တို့ရောက်နေတာကို သူတို့ကြိုသိသွားတယ်ထင်တယ်။ ခရီးသည်တင် ယာဉ်တစ်စီးနဲ့ စစ်သားတွေ ရောက်လာပြီးတော့ သူတို့ဘက်က အရင်စပစ်လို့ တိုက်ပွဲဖြစ်သွားတာ။”
နာရီဝက်နီးပါး အပြန်အလှန်ပစ်ခတ်မှုအပြီးတွင် ပြည်သူ့ကာကွယ်ရေးတပ်ဖွဲ့ဝင်တွေကတော့ ထိခိုက်ဒဏ်ရာရတာမရှိဘဲ ပြန်ဆုတ်နိုင်ခဲ့တယ်လို့ သိရပါတယ်။
အဆိုပါတိုက်ပွဲမှာ ရွာငံမြို့ပြပြောက်ကျားတပ်ဖွဲ့ YUG ၊ တောင်ကြီးမြို့ ပြည်သူ့ကာကွယ်ရေးတပ်ဖွဲ့TPDFနဲ့ ရှမ်းအမျိုးသားကာကွယ်ရေးတပ်ဖွဲ့ SNDFက ရဲဘော်တွေ ပူးပေါင်း ပါဝင်တိုက်ခိုက်ခဲ့တာဖြစ်ပါတယ်။
