မြန်မာပြည်ဟာ ယူကရိန်းလို စစ်လက်နက်အကူအညီ ဘာကြောင့်မရတာလဲ။ အဓိကအချက်ကတော့ အမေရိကန် မဟာမိတ်တွေအနေနဲ့ ရုရှားရဲ့ ကျူးကျော်တိုက်ခိုက်ခြင်းဟာ ဥရောပနဲ့ အနောက်နိုင်ငံတွေရဲ့ လုံခြုံရေးကို အရေးကြီးတဲ့ တိုက်ရိုက်ခြိမ်းခြောက်မှုအဖြစ် ရှုမြင်တာ ဖြစ်ပါတယ်။ ယူကရိန်းနိုင်ငံသားတွေကို ကူညီခြင်းဟာ အမှန်မှာတော့ အနောက်နိုင်ငံတွေဟာ သူတို့ရဲ့ ကိုယ်ပိုင်လုံခြုံရေးကို ကာကွယ်နေခြင်းသာ ဖြစ်ပါတယ်။

ဒါ့အပြင် အရေးကြီးတဲ့ အကြောင်းအရင်းအနေနဲ့ အနောက်နိုင်ငံတွေဟာ ပူတင်ရဲ့ တစထက်တစ ပြင်းထန်လာတဲ့ နိုင်ငံခြားရေးမူဝါဒကို ချွေးသိပ်နေခဲ့တာ ၁၀ နှစ်ကျော် ကြာနေခဲ့ပြီ ဖြစ်ပါတယ်။ ဒီတကြိမ်မှာတော့ ပူတင်ဟာ တော်တော်‌ခြေလွန်လက်လွန်ဖြစ်သွားခဲ့ပြီး တခြား အချုပ်အခြာအာဏာပိုင် နိုင်ငံတစ်ခုကို တိုက်ရိုက်ကြီး ပြောင်ပြောင်တင်းတင်း ပေါ်ပေါ်တင်တင် သွားရောက်တိုက်ခိုက်ခဲ့တာပါ။

တဘက်မှာတော့ မြန်မာနိုင်ငံမှာ ဖြစ်ပျက်နေတဲ့ အခြေအနေတွေကို အနောက်နိုင်ငံတွေဟာ ကျေနပ်ခြင်းမရှိသလို စစ်အာဏာရှင်ဆန့်ကျင်ရေး လှုပ်ရှားမှုတွေကိုလည်း အမှန်တကယ် စာနာနားလည်သည့်တိုင် ဒီအခြေအနေတွေဟာ အနောက်နိုင်ငံတွေရဲ့ လုံခြုံရေးနဲ့ အမျိုးသားအကျိုးစီးပွားကို တိုက်ရိုက်ထိပါးနေတာမျိုး ရှိမနေပါဘူး။

ဒုတိယတချက်ကတော့ အနောက်နိုင်ငံတွေအနေနဲ့ မြန်မာ့အရေးမှာ ပိုပြီးအင်တိုက်အားတိုက် ပါဝင်လာဖို့ အဆင်သင့်မဖြစ်သေးရခြင်း အကြောင်းကတော့ မြန်မာနိုင်ငံရဲ့ အိမ်နီးချင်းတွေနဲ့ အာရှဒေသတွင်း အဓိကကျတဲ့နိုင်ငံတွေ ဘာတွေ လု‌ပ်နေကြသလဲ၊ ဘာတွေ မလုပ်ကြဘူးလဲ ဆိုတာကို စောင့်ကြည့်နေတာကြောင့် ဖြစ်ပါတယ်။

ဒေသတွင်း အဓိကပါဝင်ပတ်သက်နေသူတွေ ကိုယ်တိုင်ကိုက စစ်ပွဲကို ဖြေရှင်းဖို့တောင် မကြိုးစားဘဲ ထိုင်စောင့်ကြည့်နေရုံသက်သက် အဆင့်သာရှိပြီး မြန်မာနိုင်ငံရဲ့ အာဏာသိမ်းခြင်းနဲ့ စစ်ပွဲတွေရဲ့ နောက်ဆက်တွဲဆိုးကျိုးတွေကို ထိန်းချုပ်ခြင်းအားဖြင့် နယ်စပ်ရေးရာအငြင်းပွားမှုတွေ ရှိမလာရေးကိုသာ   အဓိကအားဖြင့် အာရုံထားနေကြတာပါ။

(ဥပမာ- များပြားလှသော စစ်ဘေးဒုက္ခသည်များ စီးဝင်လာမှုနှင့် ပတ်သက်လို့) ဒီလို အိမ်နီးချင်းနိုင်ငံတွေနဲ့ ဒေသတွင်းအလွှာတွေက မလှုပ်မယှက် ရှိနေတာကြောင့် အနောက်နိုင်ငံတွေကလည်း ကြားဝင်စွက်ဖက်ရေးကို စိတ်ဝင်စားခြင်း မရှိတာပါ။ အမေရိကန်အနေနဲ့ မြန်မာ့မြေပေါ်မှာ တရုတ်နဲ့ proxy စစ်ပွဲဖြစ်ရတဲ့အခြေအနေမျိုး ဖြစ်ချင်ပုံ မရပါဘူး။

ယူကရိန်းပြည်သူတွေကို နိုင်ငံတစ်ခုအနေနဲ့ သိပ်ကို အင်အားကောင်းကောင်းနဲ့ ညီညွတ်ကြကြောင်း မျက်ဝါးထင်ထင်မြင် တွေ့လိုက်ကြရခြင်းကလည်း အရမ်းအရေးကြီးတဲ့အချက် ဖြစ်ပါတယ်။ အခုအချိန်မှာ ယူကရိန်းပြည်သူတွေကို ကူညီနေကြသူတိုင်းက ယူကရိန်းတို့ရဲ့ နိုင်ငံတွင်း စည်းလုံးညီညွတ်မှုဟာ အလွန်ခိုင်မာပြီး တည်ငြိမ်မှုရှိတယ်လို့ ယုံကြည်နေကြတာပါ။ မြန်မာနိုင်ငံမှာတော့ ဒီလိုစုစည်းမျိုးရှိတယ်လို့ ပြည်ပက မူဝါဒရေးဆွဲသူတွေက မမြင်ကြပါဘူး။  ဆန့်ကျင်ဘက်အဖြစ် ပါဝင်ပတ်သက်နေသူတွေနဲ့ နိုင်ငံရေးကစားသူတွေရဲ့ မတူညီတဲ့ ဆန္ဒတွေ၊ ဦးတည်ချက်တွေရဲ့ကြား အလွန်အင်မတန်ကွဲပြားပြီး ရှုပ်ထွေးတဲ့ အစုအပေါင်းကြီးလို့တောင် မြင်ထားကြတာပါ။

ဘယ်လိုပဲဖြစ်ဖြစ် ယူကရိန်းတို့ကို အနောက်နိုင်ငံတွေက ပေးနေတဲ့ စစ်ရေးအကူအညီပမာဏကို သိထားတာရယ်၊ အာဏာသိမ်းစစ်တပ်ရဲ့ ရန်လိုတဲ့၊ ပြည်သူတွေအပေါ် အကြမ်းဖက်နေတဲ့ စစ်ပွဲတွေကို အဆုံးသတ်ဖို့ အထိရောက်ဆုံးနည်းလမ်းဟာ တပ်မတော်နဲ့ အတိုက်အခံတော်လှန်ရေး အင်အားစုတွေရဲ့အကြား စစ်အင်အားမညီမျှမှုကို လျှော့ချခြင်းဖြစ်ကြောင်း နိုင်ငံတကာ သံတမန်တွေကို အကျိုးအကြောင်းရှင်းပြ ဆွေးနွေးနေကြဖို့ နည်းလမ်းရယ်ဟာ အသုံးဝင်နေဆဲ ဖြစ်ပါတယ်။

ဒီလိုမြန်မာပြည်အတွက် အကျိုးအကြောင်းနဲ့ ထောက်ပြ ပြောဆိုနေတာကို လောလောဆယ်မှာ လက်မခံကြသေးသော်လည်း ကျနော်တို့ ဒီကိစ္စကို ထပ်ကာထပ်ကာ ဆက်လက်ဆွေး‌နွေး ငြင်းခုံနေသင့်ပါတယ်။ 

ဒါမှသာ ဒီစစ်ပွဲကို အဆုံးသတ်ဖို့ ပိုနီးစပ်လာမှာဖြစ်သလို တစုံတဦးက စစ်အာဏာရှင်ဆန့်ကျင်ရေး လှုပ်ရှားမှုတွေအတွက် လက်နက်တစုံတရာ (အဓိကအားဖြင့် ပခုံးထမ်းလေယာဥ်ပစ်လက်နက်၊ သို့မဟုတ် လေကြောင်းကာကွယ်ရေးစနစ်တွေ၊ ပခုံးထမ်း သံချပ်ကာယာဉ်ဖျက်ဆီးရေးစနစ်တွေ) သီးသန့်ထောက်ပံ့ပေးနိုင်ဖို့ ဆွေးနွေးခြင်းတွေဆီကို ဦးတည်ပေးနိုင်ပါလိမ့်မယ်။

ယူကရိန်းရဲ့ စစ်ပွဲအတွက်ကြိုးပမ်းမှုမှာ ကမ္ဘာ့နိုင်ငံပေါင်း ၂၅ နိုင်ငံကျော်က ပူးပေါင်းပါဝင်ပြီး ထောက်ပံ့ကူညီနေကြတာဖြစ်ပါတယ်။

အမေရိကန်ဟာ ဒေါ်လာဘီလျံပေါင်းများစွာတန်ဖိုးရှိတဲ့ ဒုံးကျည်တွေ၊ ခဲယမ်းမီးကျောက်တွေ နဲ့ တခြားပစ္စည်းတွေကို ရှေ့တန်းစစ်မျက်နှာသို့ ပို့ဆောင်ပေးခဲ့ပါတယ်။ 

ဥရောပသမဂ္ဂကလည်း ပေါင်သန်း ၅၀၀ (ဒေါ်လာ ၅၅၁ သန်း) တန်ဖိုးနဲ့ညီမျှတဲ့ ပစ္စည်းတွေကို ဥရောပနိုင်ငံ ၂၇ နိုင်ငံအစုအဖွဲ့အတွက် ပထမဆုံးအနေဖြင့် ယူကရိန်းနိုင်ငံအား လက်နက်တပ်ဆင်ရာမှာ ကူညီပေးဖို့ လက်မှတ်ရေးထိုးခဲ့ပါတယ်။ 

ဖင်လန်နိုင်ငံနဲ့ ဂျာမနီနိုင်ငံတို့ကလည်း စစ်နယ်မြေသို့  စစ်လက်နက် တင်ပို့ခြင်းကို တားမြစ်ထားတဲ့ သူတို့ရဲ့ကာလကြာရှည်မူဝါဒတွေကို ပြန်လည်ပြင်ဆင်ရေးသားခဲ့ကြပါတယ်။

အကြောင်းအမျိုးမျိုးကြောင့် နေတိုးနဲ့ မဟာမိတ်တွေအနေနဲ့ ကျနော်တို့ ကြိုတွေးကြည့်နိုင်သလောက် အနာဂတ်အတွင်းမှာ မြန်မာနိုင်ငံကိုတော့ ဒီလိုမျိုးလုပ်ဆောင်ပေးဖို့ ဖြစ်နိုင်ခြေ နည်းပါတယ်။

အီဂေါဗလာဇီဗစ်