စစ်ကိုင်းတိုင်း၊ ခင်ဦးမြို့နယ်၊ ငါးတင်းကြီးကျေးရွာကို စစ်ကောင်စီတပ်က ဧပြီ ၃ ရက်နေ့ မနက် ၉ နာရီကျော်က မီးရှို့နေတာတွေ လုပ်ဆောင်နေတယ်လို့ ဒေသခံတွေက ပြောပါတယ်။

ဒေသခံရွာသားတဦးက “သူတိုရွာထဲဝင်ကတည်းက လက်နက်ကြီး၊ လက်နက်ငယ်များ ရမ်းသမ်းပစ်ခတ်ဝင်ရောက်ခဲ့တာဗျ။ အင်အား ၈၀ လောက်တော့ရှိမယ်။ လူတွေကတော့ အသက်လုထွက်ပြေးခဲ့ရတယ်။ အဘိုး၊ အဘွားတွေနဲ့ ကလေးငယ်လေးတွေလည်း ပိတ်မိနေကြတာတွေ ရှိခဲ့တယ်” လို့ ပြောပါတယ်။

ငါးတင်းကြီးကျေးရွာကို မီးရှို့နေတဲ့ စစ်ကောင်စီတပ်ဟာ ပြီးခဲ့တဲ့ ဧပြီ ၁ ရက်နဲ့ ၂ ရက်နေ့တွေကလည်း မင်းဝံစိုက်ကွင်းကျေးရွာကို နှစ်ကြိမ်မီးရှို့တာတွေ လုပ်ခဲ့ပါတယ်။ 

ဧပြီ ၁ ရက်ကနေ ၃ ရက်နေ့အထိ ငါးတင်းကြီးကျေးရွာနဲ့ မင်းဝံစိုက်ကွင်းကျေးရွာတွေ မီးရှို့ခံနေရတာဖြစ်ပြီး စစ်ကောင်စီတပ် ကျေးရွာတွေကနေ မထွက်သေးတာကြောင့် နေအိမ်ဘယ်လောက် မီးလောင်ဆုံးရှုံးတယ်ဆိုတာ အတိကျမပြောနိုင်သေးဘူးလို့ ရွာသားတွေက ပြောပါတယ်။

စစ်ကိုင်းတိုင်း ခင်ဦးမြို့နယ်ထဲ မတ် ၅ ရက်ကနေ ၁၅ ရက်အထိ စစ်ကောင်စီတပ်တွေ စစ်ကြောင်းထိုး ဝင်ရောက်မီးရှို့ခဲ့တာကြောင့် ကျေးရွာ ၄ ရွာက ပြည်သူတွေရဲ့နေအိမ် ၁၀‌၀ ကျော် ဆုံးရှုံးခဲ့ရပြီး ပြည်သူ ၃ ဦးအသတ်ခံရကာ PDF ရဲဘော် ၁၅ ဦး ကျဆုံးခဲ့တယ်လို့ ဒေသခံ စစ်ဘေးရှောင်ကူညီကယ်ဆယ်ရေးပရဟိတသမားတွေက ပြောပါတယ်။

ခင်ဦးမြို့နယ်အတွင်း စစ်ကောင်စီ ခလရ ၇၇ တပ်ရင်းက အင်အား ၂၀၀ လောက် စစ်ကြောင်းထိုးနေတာကြောင့် ကျေးရွာ ၂၀ လောက်က ပြည်သူတွေ စစ်ဘေးရှောင်နေကြရတယ်လို့ ဒေသခံတွေက ပြောပါတယ်။