မုံရွာမြို့၊ နန္ဒဝန်ရပ်ကွက်၊ အေးရိပ်သာလမ်းမှာ ဧပြီ ၂ ရက် ဒီနေ့ မနက် ၉ နာရီလောက်က ဒေသခံပြည်သူ့ကာကွယ်ရေးပြောက်ကျားတပ်တွေက စစ်ကောင်စီတပ်ဖွဲ့ဝင်တွေလိုက်ပါလာတဲ့ အိမ်စီးကားတွေ ဖြတ်သန်းလာချိန် လက်ပစ်ဗုံးနဲ့ တိုက်ခိုက်ခဲ့ရာမှာ အထိခိုက်ရှိနိုင်ပေမဲ့ အသေးစိတ်မသိရှိရသေးဘူးလို့ မြို့ခံ ပြောက်ကျားတပ်ဖွဲ့ကပြောပါတယ်။
မုံရွာဒေသခံပြည်သူ့ကာကွယ်ရေးပြောက်ကျားတပ်ဖွဲ့ဝင် တယောက်က " ကျနော်တို့ အသေးစိတ် Plan ချပြီး လုပ်ဆောင်ခဲ့ပေမဲ့ Mission တစ်နေရာပဲ လုပ်ခဲ့နိုင်တယ်။ သူတို့ (စစ်ကောင်စီတပ်) အထိခိုက်တော့ လုံခြုံရေးကြောင့် ပြန်မကြည့်မိနိုင်ခဲ့ဘူး။ စုံစမ်းနေဆဲပဲ။ တခြားနေရာတွေမှာက လမ်းသွားလမ်းလာ ပြည်သူတွေရှိနေတော့ ပြည်သူကိုထိမှာစိုးလို့ မလုပ်ခဲ့ဘဲ ဖျက်သိမ်းခဲ့ရတာ။ ဒေသခံပြည်သူတွေကို ပြောချင်တာက ကျနော်တို့ ထုတ်ပြန်ထားတာကိုတော့ အသက်နဲ့ရင်းပြီး လုပ်ဆောင်နေရတဲ့ ကျနော်တို့ကို ကူညီတဲ့အနေနဲ့ အတတ်နိုင်ဆုံး လိုက်နာပေးကြပါ" လို့ ပြောပါတယ်။
အဲ့ဒီတိုက်ခိုက်မှုကို ဒဿပျောက်ကြားတပ်ဖွဲ့နဲ့ Monywa Generation Tigers က လုပ်ဆောင်ခဲ့တာဖြစ်တယ်လို့ ထုတ်ပြန်ထားပါတယ်။
ဧပြီ ၂ ရက် မနက် ၉ နာရီကနေ ညနေ ၃ နာရီထိ ကျန်းမာရေးကိစ္စကလွဲလို့ အတတ်နိုင်ဆုံး အိမ်အပြင်မထွက်ကြဖို့ မုံရွာမြို့ဒေသခံပြည်သူကို ဒေသခံပြောက်ကျားတပ်က မေတ္တာရပ်ခံထုတ်ပြန်ထားတာ ဖြစ်ပါတယ်။
မုံရွာမြို့မှာ စစ်ကောင်စီတပ်ဖွဲ့ဝင်တွေက လက်နက်ကြီး ၊ လက်နက်ငယ်တွေနဲ့ လှည့်ပတ်နေတာရှိသလို အရပ်ဘက်ကားတွေနဲ့ ရပ်ကွက်တွေထဲ ကင်းပုံးဝပ်နေတာတွေလည်း ရှိနေပါတယ်။
