စစ်ကိုင်းတိုင်း နာဂ ကိုယ်ပိုင် အုပ်ချုပ်ခွင့်ရ ဒေသရှိ စစ်ကောင်စီ အုပ်ချုပ်ရေး ယန္တရားတွေ၊ အဓိက ထောက်တိုင်တွေ ဖြစ်တဲ့ အုပ်ချုပ်ရေးမှူးအားလုံး ဧပြီ ၃၀ ရက် နောက်ဆုံးထားနုတ်ထွက်ဖို့ နာဂ ပြည်သူ့ကာကွယ်ရေးအဖွဲ့ (NPDF) က မတ် ၂၆ ရက်နေ့မှာ ထုတ်ပြန်ထားပါတယ်။
"ကျနော်တို့နာဂမြေပေါ်မှာ ခေတ်အဆက်ဆက် စစ်အာဏာရှင်များ ကျူးလွန်ခဲ့သော မတရားမှုများ ဆက်လက် မကျူးလွန်နိုင်စေရန် စစ်ကောင်စီခန့် အုပ်ချုပ်ရေး ယန္တရားများ မှန်သမျှကို အရင်ဆုံးဖြိုဖျက်သွားမယ်။ ကျနော်ပြင်ဆင်စရာရှိတာတွေ ပြင်ဆင်ထားတယ်။ အခုစစ်ကောင်စီခန့် အုပ်ချုပ်ရေးမှူးများ ဧပြီလ ၃၀ ရက်နေ့ နုတ်ထွက်ရက်ထုတ်ပြန်ခဲ့တယ်။ အဲလိုထုတ်ပြန်လို့ မနုတ်ထွက်ဘူးဆိုရင် ဖြစ်လာမဲ့အကျိုးဆက်တွေကို ကျနော်တို့ NPDF ကနေ တာဝန်မယူဘူး” လို့ နာဂပြည်သူ့ကာကွယ်ရေးတပ်ဖွဲ့ NPDF ကာကွယ်ရေး တာဝန်ခံ ဗိုလ်လင်းယုန်က ပြောပါတယ်။
နာဂကိုယ်ပိုင်အုပ်ချုပ်ခွင့်ရ ဒေသမှာရှိတဲ့ အုပ်ချုပ်ရေးမှူးများ သတ်မှတ်ရက် ကျော်လွန်ပြီး ဆက်လက် တာဝန်ထမ်းဆောင်ပါက အရေးယူမှာဖြစ်ပြီး နောက်ဆုံးအကြိမ် သတိပေးတာလို့ ဖော်ပြထားပါတယ်။
