ဝေါမြို့နယ်တွင် ဒုရဲအုပ်တဦး ပစ်သတ်ခံရ
DVB
·
March 10, 2022
ပဲခူးတိုင်းဒေသကြီး ဝေါမြို့မှာ ဒုရဲအုပ်အဆင့် ရဲတပ်ဖွဲ့ဝင်တဦး သေနတ်နဲ့ အနီးကပ် ပစ်ခတ်ခံရပြီး သေဆုံးသွားတယ်လို့ မြို့ခံတွေက ပြောပါတယ်။
မြို့ခံတဦးက “မတ်လ ၉ ရက်နေ့ ည ၈ နာရီလောက်က ရဲစခန်းအနီးက ထမင်းဆိုင်မှာ ဒုရဲအုပ်က အဖော်တဦးနဲ့အတူ ရှိနေတုန်း အမည်မသိသူတဦးက ပစ္စတိုသေနတ်နဲ့ အနီးကပ် ပစ်လိုက်တာ သေသွားတယ်။ အတူပါလာတဲ့ အဖော်လည်း ဒဏ်ရာရသွားတယ်” လို့ ပြောပါတယ်။
ဒုရဲအုပ်သေဆုံးမှုနဲ့ ပတ်သက်ပြီး ဝေါ PDF က “ပြည်သူလူထုကို ဖမ်းဆီးနှိပ်စက် ငွေကြေးကောက်ခံနေတာကြောင့် ထမင်းကြော်ဆိုင်ရှေ့မှာ ပစ်ခတ်တိုက်ခိုက်ခဲ့တာ၊ ဒုရဲအုပ်တယောက် သုတ်သင်ရှင်းလင်းနိုင်ခဲ့ပြီး ဒလန်တဦးလည်း ထိခိုက်ဒဏ်ရာ ရရှိခဲ့ပါတယ်” လို့ ဆိုပါတယ်။
ပစ်ခတ်မှုအပြီးမှာ စစ်ကောင်စီတပ်ဖွဲ့ဝင်တွေ မြို့အတွင်း ပိတ်ဆို့ရှာဖွေမှုတွေ လုပ်ဆောင်ခဲ့တယ်လို့ မြို့ခံတွေက ပြောပါတယ်။
