မန္တလေးတိုင်းအတွင်း ဗုံးပေါက်ကွဲ၊ လျှပ်စစ်ကျွမ်းကျင် ဝန်ထမ်း ၁ ဦးဒဏ်ရာရ
DVB
·
February 15, 2022
မန္တလေးတိုင်း၊ မဟာအောင်မြေမြို့နယ်နဲ့ ပုသိမ်ကြီးမြို့နယ်တို့မှာ ဖေဖော်ဝါရီ ၁၄ ရက် ည ၇ နာရီကျော်လောက်က ဗုံးပေါက်ကွဲမှုတွေဖြစ်ခဲ့ပြီး ဒဏ်ရာရသူ တယောက် ရှိခဲ့ပါတယ်။
ပုသိမ်ကြီးမြို့နယ် ကျောက်မီးကျေးရွာအုပ်စု၊ ကျောက်မီးကျေးရွာမှာရှိတဲ့ လျှပ်စစ်ဓာတ်အားခွဲရုံး ဝင်းထဲမှာ လက်လုပ်မိုင်းတစ်လုံး ပေါက်ကွဲခဲ့တာဖြစ်ပြီး တာဝန်ကျနေတဲ့ လျှပ်စစ်ကျွမ်းကျင် ဝန်ထမ်း ဦးခင်မောင်ဦး ဒဏ်ရာအနည်းငယ်ရရှိခဲ့ပါတယ်။
မဟာအောင်မြေမြို့နယ်၊ မဟာနွယ်စဉ်ရပ်ကွက် ၃၆ လမ်း၊ ၆၉ လမ်းနဲ့ လမ်း ၇၀ ကြားရှိ စည်ပင်ဝန်ထမ်းအိမ်ရာ အပြင်ဘက် ရေဆိုးမြောင်းအတွင်းမှာလည်း မနေ့ညက လက်လုပ်ဗုံးတစ်လုံး ပေါက်ကွဲခဲ့ပါတယ်။
ဒီလိုဗုံးပေါက်ကွဲမှုဖြစ်ခဲ့ပေမဲ့ လူတွေ ထိခိုက်ဒဏ်ရာရတာနဲ့ အဆောက်အဦ ထိခိုက်ပျက်စီးတာမရှိဘူးလို့ သိရပါတယ်။
