ရှမ်းပြည်မြောက်ပိုင်း လားရှိုးမြို့နယ် မိုင်းယော်တိုက်နယ် ပန်သပြေကျေးရွာအုပ်စု နဲ့ လွိုင်စန့်ကျေးရွာအုပ်စုမှာ ဖေဖော်ဝါရီလ ၁၃ ရက်နေ့ ည ၈ နာရီလောက်ကနေ ည ၁ နာရီ ကျော်အထိ စစ်ကောင်စီတပ်နဲ့ မြောက်ပိုင်းမဟာမိတ်တို့ကြား တိုက်ပွဲဖြစ်ပွားခဲ့တယ်လို့ သိရပါတယ်။
မြောက်ပိုင်းမဟာမိတ်နဲ့ စစ်ကောင်စီတပ်မ ၉၉ တို့ တိုက်ပွဲဖြစ်ပွားခဲ့တာဖြစ်ပြီး ပန်သပြေ ကျေးရွာဘက်ကို တိုက်လေယာဉ် ၂ စီးနဲ့ လေကြောင်းတိုက်ခိုက်မှုတွေ ပြုလုပ်နေတာကြောင့် ဖေဖော်ဝါရီ ၁၄ ရက်နေ့က ပန်သပြေ ကျေးရွာနဲ့ လွိုင်စန့်ကျေးရွာ ဒေသခံ ရာချီ မိုင်းယော် နဲ့ လားရှိုးမြို့နယ်ကို ထွက်ပြေးတိမ်းရှောင်နေရတယ်လို့ ဒေသခံတစ်ဦးက ဒီဗွီဘီကို ပြောပါတယ်။
တိုက်ပွဲအတွင်း ထွက်ပြေးတိမ်းရှောင်လာသူ အများစုဟာ အမျိုးသမီးနဲ့ အသက်ကြီးရွယ်အို တွေဖြစ်ပြီး လူငယ်ပိုင်း နဲ့ လူကြီးပိုင်းတွေက ကျေးရွာအတွင်းမှာ ကျန်နေခဲ့တယ်လို့ သိရပါတယ်။
ပြီးခဲ့တဲ့ ဇန်နဝါရီလ ၂၈ နေ့ကတည်းက မိုင်းယော်တိုက်နယ်အတွင်း စစ်ကောင်စီတပ်နဲ့ မြောက်ပိုင်းမဟာမိတ်တို့ကြားတိုက်ပွဲတွေ ပြင်းထန်စွာ ဖြစ်ပွားခဲ့ပြီး လေကြောင်းတိုက်ခိုက်မှုတွေလည်း ရှိခဲ့သလို လက်ရှိမှာလည်း စစ်ရေးတင်းမာနေတယ်လို့ သိရပါတယ်။
တိုက်ပွဲအခြေအနေနဲ့ပတ်သက်ပြီး ထိခိုက်ကျဆုံးမှုအခြေအနေကို နှစ်ဖက်တပ်တွေ သတင်းထုတ်ပြန်တာတော့ မရှိသေးပါဘူး။
မိုင်းယော်ဒေသမှာ ကိုးကန့်တပ်၊ အေအေနဲ့ တီအန်အယ်လ်အေတပ်ဖွဲ့တွေ လှုပ်ရှားသွားလာနေကြတာလို့ သိရပါတယ်။
