မန္တလေးတိုင်း၊ စဉ့်ကူးမြို့နယ်၊ လက်ပန်လှကျေးရွာအုပ်စု၊ ပင်လယ်ကြီးကျေးရွာအနီး၊ မန္တလေး - မိုးကုတ် ကားလမ်းမကြီးဘေးရှိ စုပေါင်းစစ်စစ်ရေးဂိတ်မှာ ဖေဖော်ဝါရီ ၁၄ ရက် မနက် ၄ နာရီဝန်းကျင်က ပစ်ခတ်မှုဖြစ်ပြီး ဒုရဲအုပ် တယောက်နဲ့ စစ်ကောင်စီတပ်သားတယောက် သေဆုံးခဲ့ပါတယ်။
ပစ်ခတ်မှုကြောင့် လက်ပန်လှနယ်မြေရဲစခန်း က ဒုရဲအုပ်မိုးဝင်းဟာ ကျည်ဆန်နားထင်ဖောက်ဝင်ပြီး ဦးခေါင်းပွင့်ထွက်ဒဏ်ရာနဲ့ သေဆုံးခဲ့တဲ့အပြင် စစ်ကောင်စီတပ်သား စိုးမော်ဦးဟာလည်း နားထင် လက်နက်ကြီးမိုင်းစထိမှန် သေဆုံးခဲ့တယ်လို့ သိရပါတယ်။
“ဖြစ်တာက တိုက်ပွဲဖြစ်တဲ့ ပုံစံပဲ အပြန်အလှန်ပစ်သံတွေကြားရတယ်။ ဗုံးပေါက်ကွဲသံတွေလည်း ကြားရတယ်။ သေဆုံးတာတွေရော ဒဏ်ရာရတာတွေပါရှိတယ်လို့တော့ ကြားမိတယ်။” လို့ လက်ပန်လှကျေးရွာနေ ပြည်သူတစ်ဦးက ပြောပါတယ်။
ဒီလို အပြန်အလှန်ပစ်ခတ်မှုကြောင့် မနက်ပိုင်းမှာ စစ်ကောင်စီတပ်သားတွေ စစ်ကားကြီး ၂ စီး နဲ့ ရောက်လာပြီး ကင်းလှည့်နေတယ်လို့ ဒေသခံတွေထံက သိရပါတယ်။
