စစ်ကိုင်းတိုင်း ကသာမြို့နယ်နဲ့ ကလေးမြို့နယ်မှာ ဖေဖော်ဝါရီ ၆ ရက်နေ့က တိုက်ပွဲတွေ ဖြစ်ပွားခဲ့ပြီး  စစ်ကောင်စီတပ်သားတွေ အများအပြား သေဆုံးဒဏ်ရာရခဲ့ကြတယ်လို့ သိရပါတယ်။

ကလေးမြို့နယ် တပ်သားရွာကို ဦးတည်ပြီး အပြစ်မဲ့ပြည်သူတွေ ထိခိုက်အောင် အဝေးပစ်လက်နက်ကြီးနဲ့ ပစ်ခတ်ခဲ့တာကို လက်တုံ့ပြန်တဲ့အနေနဲ့ ကလေးပြည်သူ့ကာကွယ်ရေးတပ်ဖွဲ့က စစ်ကောင်စီစစ်ကြောင်းကို ဖေဖော်ဝါရီ ၆ ရက်နေ့က မိုင်းခွဲတိုက်ခိုက်ခဲ့တာကြောင့် စစ်ကောင်စီတပ်သား ၂၀ လောက် သေဆုံးသွားတယ်လို့ ကလေး PDF က ထုတ်ပြန်ပါတယ်။

ကလေးမြို့နယ်တောင်ပိုင်း ကြံသာရွာနဲ့ ဟံသာဝတီရွာတို့မှာ တပ်စွဲထားတဲ့ စစ်ကောင်စီတပ်ဟာ ဖေဖော်ဝါရီ ၆ ရက်နေ့ မနက် ၉ နာရီကနေ ၁၁ နာရီလောက်အထိ တပ်သားရွာကိုဦးတည်ပြီး အဝေးပစ်အမြောက်လက်နက်ကြီးတွေနဲ့ ဆက်တိုက်ပစ်ခတ်ခဲ့တာလို့ ဆိုပါတယ်။

အဲလိုစစ်ကောင်စီတပ်ကပစ်ခတ်တဲ့ လက်နက်ကြီးကျည် ကျရောက်ပေါက်ကွဲတာကြောင့် တပ်သားရွာက အသက် ၉ နှစ်အရွယ် ကလေးအပါအဝင် အပြစ်မဲ့ပြည်သူ ၁၀ ဦး ဒဏ်ရာရခဲ့ပြီး ၄ ဦး ဒဏ်ရာပြင်းထန်တယ်လို့ သိရပါတယ်။

လက်နက်ကြီး ပစ်ခတ်ခံရတာကြောင့် တပ်သားရွာက လူနေအိမ် ၅ လုံး ထိမှန်မီးလောင်ခဲ့ပြီး တပ်သားရွာ၊ အောင်မင်္ဂလာရွာ၊ မှန်တောရွာ၊ ရှားဖိုရွာ၊ ကျောက်ဖူးရွာ စတဲ့ကျေးရွာတွေက ဘေးလွတ်ရာကို ထွက်ပြေးတိမ်းရှောင်ကြရတယ်လို့ သိရပါတယ်။

အဲဒီလို အပြစ်မဲ့ပြည်သူတွေကိုထိခိုက်အောင် လက်နက်ကြီးနဲ့ပစ်ခတ်မှုကို လက်တုံ့ပြန်တဲ့အနေနဲ့ ကလေး PDF က စစ်ကောင်စီစစ်ကြောင်းကို  မိုင်းနှစ်ကြိမ်ခွဲ တိုက်ခိုက်ခဲ့တာလို့ ကလေး PDF က ထုတ်ပြန်ထားပါတယ်။

ဖေဖော်ဝါရီ ၆ ရက်နေ့ ညနေပိုင်းမှာ ကလေးနည်းပညာတက္ကသိုလ်ဘက်ကနေ ကလေးမြို့ဘက်ကို ဦးတည်လာတဲ့ အင်အား ၆၀ လောက်ရှိတဲ့ စစ်ကောင်စီစစ်ကြောင်းကို ဇင်းကလင်းရွာနဲ့ ချင်းဆိုင်ရွာကြားမှာ မိုင်းခွဲတိုက်ခိုက်ခဲ့တာကြောင့် စစ်ကောင်စီတပ်သား ၁၅ ဦးလောက် သေဆုံးခဲ့တယ်လို့ သိရပါတယ်။ 

မိုင်းစထိမှန်ဒဏ်ရာရတဲ့ စစ်ကောင်စီတပ်သားတွေကို ကလေးမြို့စစ်ဆေးရုံ ပို့ဆောင်ကုသရာမှာ ၅ ဦး ထပ်မံသေဆုံးခဲ့တယ်လို့ ဆိုပါတယ်။

ဖေဖော်ဝါရီ ၃ ရက်နေ့ မနက် ၆ နာရီလောက်ကလည်း ကြံသာရွာမှာတပ်စွဲထားတဲ့ စစ်ကောင်စီတပ်ဖွဲ့နဲ့ ဒေသခံပြည်သူ့ကာကွယ်ရေးပူးပေါင်းတပ်ဖွဲ့တွေ ၂ နာရီလောက်ကြာ တိုက်ပွဲဖြစ်ခဲ့ပြီး စစ်ကောင်စီတပ်သား ၂ ဦး သေဆုံးခဲ့တယ်လို့ သိရပါတယ်။

အဲဒီနေ့ည ၁၀ နာရီလောက်မှာလည်း ကလေးမြို့ကနေတောင်ပိုင်းကို ဦးတည်မောင်းနှင်လာတဲ့ စစ်ကောင်စီကားကို ချင်းဆိုင်ရွာနဲ့ဇင်းကလင်းရွာကြားမှာ ပြည်သူ့ကာကွယ်ရေးတပ်ဖွဲ့တွေက မိုင်းဆွဲတိုက်ခိုက်ခဲ့ရာမှကြာပေါ်ပါတဲ့ စစ်ကောင်စီတပ်သား ၃ ဦးသေဆုံးခဲ့တယ်လို့ ကလေးPDF က ထုတ်ပြန်ထားပါတယ်။

ကလေးမြို့နယ်တောင်ပိုင်းမှာ စစ်ရေးအခြေအနေတင်းမာနေတာကြောင့် ကလေး -ဂန့်ဂေါလမ်းမကြီးကို ပြည်သူတွေ မသွားလာကြဖို့ ကလေး PDF က သတိပေးထားပါတယ်။

ကသာမြို့နယ်မှာလည်း ဒေသခံပြည်သူ့ကာကွယ်ရေးပူးပေါင်းအဖွဲ့တွေနဲ့ စစ်ကောင်စီတပ်တို့ ဖေဖော်ဝါရီ ၆ ရက်နေ့က တိုက်ပွဲဖြစ်ပွားရာမှာ စစ်ကောင်စီတပ်သား ၁၆ ဦးသေဆုံးပြီး အများအပြားဒဏ်ရာရရှိခဲ့တယ်လို့ Katha Revolution က ထုတ်ပြန်ထားပါတယ်။

ကသာမြို့နယ် မှတ်တိုင်ကျေးရွာအုပ်စု၊ နမ့်စမ်းရွာအောက်ဘက် အနီးက တပ်မ (၈၈) လက်အောက်ခံ တပ်ရင်း (၄၅၁) စစ်ကောင်စီတပ်နဲ့ ကသာ (PDF)၊ ကသာမြို့နယ်ပြည်သူ့ကာကွယ်ရေးတပ်ဖွဲ့(ပ-က-ဖ)၊ မြို့လှ PDF ပူးပေါင်းတပ်ဖွဲ့တို့ ဖေဖော်ဝါရီ ၆ ရက်နေ့ မနက် ၉ နာရီကနေ မွန်းတည့် ၁၂ နာရီခန့်အထိ ၃ နာရီလောက်ကြာ တိုက်ပွဲဖြစ်ခဲ့တာပါ။

အင်အား ၈၀ လောက်ရှိတဲ့ စစ်ကောင်စီတပ်ကို ဒေသခံပူးပေါင်းကာကွယ်ရေးတပ်ဖွဲ့က စောင့်ကြိုတိုက်ခိုက်ခဲ့တာဖြစ်ပြီး စစ်ကောင်စီတပ်ဟာ နမ့်စမ်းရွာမြီးမှာရှိတဲ့ သရှုက်ခြံနဲ့ လယ်ပြင်တောစပ်ကနေ လက်နက်ကြီးနဲ့ပြန်လည်ပစ်ခတ်ခဲ့တယ်လို့ သိရပါတယ်။ 

တိုက်ပွဲအတွင်းမှာ စစ်ကောင်စီတပ်က လက်နက်ကြီး အလုံး ၅၀ ထက်အနည်း ပစ်ခတ်ခဲ့တာကြေင့် ကျေးရွာနေ ဒေသခံပြည်သူတွေဘေးလွတ်ရာကို တိမ်းရှောင်နေကြရတယ်လို့ မြို့လှ PDF က ဆိုပါတယ်။

တိုက်ပွဲမှာ အနီးကပ်ဝင်ရောက်ပစ်ခတ်ခဲ့တာကြောင့် စစ်ကောင်စီဘက်က ၁၆ ဦးထက်မနည်းသေဆုံးပြီး အများအပြားဒဏ်ရာရရှိခဲ့တာတာလို့ ဆိုပါတယ်။

ပြည်သူ့ကာကွယ်ရေးပူးပေါင်းတပ်ဖွဲ့ဘက်က ခြေတောက်နဲ့တင်ပါးမှာ ဒဏ်ရာရရှိခဲ့တဲ့ ရဲဘော် ၂ ဦး ကိုတော့ ကသာထောက်ပို့အဖွဲ့က ကယ်ထုတ်နိုင်ခဲ့ပြီး ဆေးဝါးကုသပေးခဲ့တယ်လို့ သိရပါတယ်။

ဖေဖော်ဝါရီ ၅ ရက်နေ့ နေ့လယ်ပိုင်းကလည်း ကသာမြို့ ဝေပေါင်တောရကျောင်းဘက်ကနေ နမ့်စမ်းရွာဘက်လာတဲ့ စစ်ကောင်စီတပ်နဲ့ ပြည်သူ့ကာကွယ်ရေးပူးပေါင်းတပ်တို့ ထိတွေ့တိုက်ပွဲဖြစ်ပွားရာမှာ စစ်ကောင်စီဘက်က အများအပြားသေဆုံးပြီး ထိခိုက်ဒဏ်ရာရရှိခဲ့တယ်လို့ သိရပါတယ်။ အဲဒီတိုက်ပွဲမှာ ပြည်သူ့ကာကွယ်ရေးတပ်ဖွဲ့ဘက်က ရဲဘော်တစ်ဦးလက်နက်ကြီးစ ထိမှန်ဒဏ်ရာရရှိခဲ့တယ်လို့ သိရပါတယ်။

တိုက်ပွဲအပြီးမှာ စစ်ကောင်စီတပ်က ရွာထဲကို ရမ်းသမ်းပစ်ခတ်တာကြောင့် နမ့်စမ်းကျေးရွာက လူ ၂ဦး ထိခိုက်ဒဏ်ရာရရှိခဲ့တယ်လို့ Katha Revolution အဖွဲ့က ထုတ်ပြန်ထားပါတယ်။

ဖေဖော်ဝါရီ ၆ ရက်နေ့က ကသာမြို့နဲ့ ကလေးမြို့နယ်တို့မှာ ဖြစ်ပွားခဲ့တဲ့ တိုက်ပွဲအခြေအနေနဲ့ ပတ်သက်ပြီး စစ်ကောင်စီဘက်ကတော့ သတင်းထုတ်ပြန်တာ မတွေ့ရသေးပါဘူး။