ရန်ကုန်တိုင်းဒေသကြီး၊ တောင်ဒဂုံမြို့နယ် အမှတ် ၂၄ ရပ်ကွက်ထဲက စည်ပင်ရုံးထဲမှာ ဖေဖော်ဝါရီ ၄ ရက် မနက်အစောပိုင်းက ဗုံး ၂ လုံးဆက်တိုက်ဖောက်ခွဲခဲ့တယ်လို့ South Dagon Guerrilla Force အဖွဲ့ထံက သိရပါတယ်။

တောင်ဒဂုံစည်ပင်ရုံးအနောက်ဘက်မှာ  မနေ့ မနက် ၄ နာရီ ခွဲလောက်က ဗုံးတစ်လုံး၊ ၄ နာရီ ၃၅ မိနစ်လောက်က  ဗုံးတစ်လုံးကို (တောင်ပိုင်းပြည်သူ့ကာကွယ်ရေးအင်အားစု) ဌာနချုပ်၊ အာဏာသိမ်းဆန့်ကျင်ရေးနှင့် ပြည်သူ့လွတ်မြောက်ရေးအဖွဲ့ (ACPLF)တို့နဲ့ ပူးပေါင်းကာ South Dargon Guerrilla Force အဖွဲ့က ပူးပေါင်းဖောက်ခွဲခဲ့တာဖြစ်ပြီး ထိခိုက်ဆုံးရှုံးမှု အတည်ပြု စစ်ဆေးနေတယ်လို့ (SDGF)အဖွဲ့က ထုတ်ပြန်ထားပါတယ်။

အလားတူ လှိုင်သာယာမြို့နယ်မှာလည်း ဖေဖော်ဝါရီ ၄ ရက် ညနေ ၄ နာရီခွဲလောက်က ကင်းလှည့်နေတဲ့ စစ်ကောင်စီ ယာဥ်တန်းကား ၃ စီးကို ဗုံး ၃ လုံးနဲ့ ပစ်ဖောက်တိုက်ခိုက်ခဲ့တယ်လို့ Spring Revolution Flames (SRF) အဖွဲ့က ထုတ်ပြန်ထားပါတယ်။

ကင်းလှည့်ယာဥ်တန်းကို From Zero To Hero (ZTH)နဲ့ Spring Revolution Flames(SRF) အဖွဲ့တို့က ပူးပေါင်းပြီး  အောက်ထိပ်မှတ်တိုင်အနီးမှာ ကြိုတင်ပြင်ဆင်ထားတဲ့ ဗုံး  ၃ လုံးနဲ့ တိုက်ခိုက်နိုင်ခဲ့ရာမှာ ကားတန်းရဲ့ နောက်ဆုံးကားမှာ ပိုမို ဗုံးထိမှန်ခဲ့ပြီး လူထိခိုက်မှု အတိအကျ မသိရသေးဘူးလို့  ဆိုပါတယ်။

အဆိုပါတိုက်ခိုက်မှုတွေနဲ့ ပတ်သက်ပြီး စစ်ကောင်စီဘက်ကတော့ သတင်းထုတ်ပြန်တာ မရှိသေးပါဘူး။