ကချင်ပြည်နယ် မြစ်ကြီးနားမြို့ လယ်ကုန်းရပ်ကွက် အမှတ် ၃၀ ရဲတပ်ရင်းအနီးမှာ ဖေဖော်ဝါရီ ၁ ရက်မနက်ပိုင်းက ဗုံးပေါက်ကွဲမှုဖြစ်ပွားအပြီး စစ်ကောင်စီတပ်က ပစ်ခတ်တာကြောင့် ကလေးငယ် (ယောကျာ်းလေး) တစ်ဦး ကျည်ထိမှန်သေဆုံးခဲ့တယ်လို့ သိရပါတယ်။
လယ်ကုန်းရပ်ကွက် အမှတ် ၃၀ ရဲတပ်ရင်းအနီး ဗုံးပေါက်အပြီး စစ်ကောင်စီတပ်ဖွဲ့ဝင်တွေက ပြန်လည်ပစ်ခတ်ခဲ့တဲ့အတွက် နေအိမ်အတွင်းက အသက် ၇ နှစ်အရွယ် မောင်ဘုန်းခန့်ထည်ဆိုသူ ကလေးငယ်ကို ကျည်ထိမှန်ခဲ့တာတာလို့ ဒေသခံတွေက ပြောပါတယ်။
“မနက် ၆ နာရီလောက် ရဲတပ်ရင်း အနားမှာ ဗုံးပေါက်တယ်။ ဗုံးပေါက်ပြီး ရဲတွေက ပြန်ပစ်တာ။ သေဆုံးတဲ့ကလေးအိမ်က ရဲတပ်ရင်းဘေးနားမှာ ကျည်က နံရံကိုဖောက်ပြီး ကလေးဗိုက်ကို လာမှန်တာ သေသွားပြီ” လို့ မိသားစုနဲ့ နီးစပ်သူ ဒေသခံတစ်ဦးကပြောပါတယ်။
သေနတ်ထိမှန်လို့ သေဆုံးသွားတဲ့ ၇ နှစ်အရွယ် ကလေးငယ်အလောင်းကို ဒီနေ့ညနေပိုင်း ရာဒါကောင်း အစ္စလမ် သုသာန်မှာ သင်္ဂြိုဟ်မယ်လို့ သိရပါတယ်။
ဖေဖော်ဝါရီ ၁ ရက်နေ့က မြစ်ကြီးနားမြို့တွင်း လုံခြုံရေး တင်းကျပ်စွာချထားပြီး တပ်မတော် ထောက်ခံပွဲလည်း ပြုလုပ်ခဲ့ပါတယ်။
