မန္တလေးမြို့မှာ၊ စစ်ကောင်စီတပ်က ဝင်ရောက်ဖမ်းဆီးတာခံရတဲ့ ကျောက်သမားတွေထဲက အယောက် ၂၀၀ နီးပါး ဇန်နဝါရီလ ၃၁ ရက် ဒီနေ့ နေ့လယ်ပိုင်းက အိုးဘိုအကျဉ်းထောင်ကနေ ပြန်လွတ်လာပါတယ်။
ဖမ်းဆီးခံခဲ့ရတာ ကျောက်သမား ၄၆၀ ကျော်ရှိတဲ့အထဲက ပြန်လွှတ်ပေးတဲ့ ကျောက်သမား ၁၉၄ ဦးရှိတယ်လို့ သိရပါတယ်။
တရားလွှတ်တော်ရှေ့နေ တစ်ဦးက “ကျောက်မျက်ဥပဒေ ပုဒ်မ ၅၄ နဲ့ စွဲခံရတဲ့သူတွေပြန်လွှတ်တာ။ ကျောက် လက်ဝယ်မတွေ့တဲ့သူတွေ။ နေ့လယ်က ပြန်လွှတ်နေတာ သုံးသုတ်ခွဲလွှတ်ပေးတာ။” လို့ ပြောပါတယ်။
ဒီဇင်ဘာ ၂၀ ရက်က အောင်မြေသာစံမြို့နယ်၊ ပြည်ကြီးရန်လုံရပ်ကွက်၊ ၁၅ လမ်းနဲ့ ၁၆ လမ်းကြား၊ ၈၇ လမ်းနဲ့ ၈၈ လမ်းကြားရှိ နေအိမ်နဲ့ ကျောက်ဝိုင်းအနီးတို့မှာ စစ်ကောင်စီတပ်သားတွေ ဝင်ရောက်ဖမ်းဆီးခဲ့တာပါ။
ဖမ်းဆီးခံရတဲ့အထဲမှာ မြန်မာကျောက်သမားတွေသာမက တရုတ်နိုင်ငံသား ကျောက်သမားတွေလည်း ပါဝင်ခဲ့ပြီး အခုပြန်လွတ်လာတဲ့အထဲမှာ တရုတ်နိုင်ငံသား ဘယ်နှယောက် ပါတယ်ဆိုတာတော့ မသိရသေးပါဘူး။
