မြန်မာစစ်အာဏာရှင် အမြစ်ပြတ်ကျဆုံးရေးနဲ့ ဖက်ဒရယ်ဒီမိုကရေစီ ထွန်းကားရေးအတွက် တောင်ကိုရီးယားနိုင်ငံ ဂယောင်နမ်ဒေသ၊ ချန်းဝမ်မြို့ရှိ ဘူတာရှေ့မှာ ဒီဇင်ဘာ ၁၉ ရက် နေ့လယ် ၁ နာရီလောက်က မြန်မာနဲ့ ကိုရီးယားတွေ ပူးပေါင်း ဆန္ဒပြခဲ့ကြပါတယ်။
၄၂ ကြိမ်မြောက်ကျင်းပတဲ့ ဒီဆန္ဒပြပွဲကို ဂယောင်နမ် နိုင်ငံခြားသားကူညီရေးစင်တာ၊ ကိုရီးယား-မြန်မာ ပူးပေါင်းလုပ်ဆောင်ရေးအဖွဲ့နဲ့ ချန်းဝမ်မြန်မာအသင်းတို့ ဦးဆောင်ပြုလုပ်ခဲ့တာ ဖြစ်ပါတယ်။
ဆန္ဒထုတ်ဖော်ပွဲမှာ မြန်မာ့ဒီမိုကရေစီအရေး အားပေးတဲ့ ကိုရီးယားနဲ့ မြန်မာတေးတွေ သီဆိုကြကာ တပတ်အတွင်း မြန်မာ့သတင်းကို ဦးနေအွန်းက ပြောကြားပြီး ဦးဇော်မိုးအောင်က စစ်အာဏာရှင်ရဲ့ အကြမ်းဖက်လုပ်ရပ်တွေကို ရှုတ်ချပြောဆို ကြပါတယ်။
ကိုရီးယားလူမျိုး မစ္စတာ ယီချောလ်စွန်းက မြန်မာ့အရေးကို ကိုရီးယားအစိုးရနဲ့ ပြည်သူတွေ ဆတက်ထမ်းပိုး ပါဝင်ကြစေဖို့ တိုက်တွန်း ပြောကြားသွားပါတယ်။
