မကွေးတိုင်းနဲ့ စစ်ကိုင်းတိုင်းတို့မှာ ဒီနေ့မနက်ပိုင်းက စစ်ကောင်စီ စစ်ဆေးရေးဂိတ်နဲ့ ယာဉ်တန်းတွေ တိုက်ခိုက်ခံခဲ့ရတယ်လို့ သိရပါတယ်။ 

မကွေးတိုင်းဒေသကြီး ပေါက်မြို့နယ်မှာ ဒီနေ့ မနက်ပိုင်းက စစ်ကောင်စီ ယာဥ်တန်းကို ပေါက် - PDF က မိုင်းဆွဲတိုက်ခိုက်ခဲ့ရာ ကားတစ်စီး ပျက်စီးပြီး တပ်သားတချို့ ထိခိုက်ဒဏ်ရာရတယ်လို့ Pauk-PDF တပ်ဖွဲ့က ပြောပါတယ်။

ပခုက္ကူမြို့ဘက်ကနေ ထွက်လာတဲ့ စစ်ကောင်စီ ထောက်ပို့ယာဥ်တန်းကို ပေါက်မြို့နယ် ရွှေလှန်ရွာနဲ့ ငါးမုတ်ကြီး ကြား ပခုက္ကူ-မင်းတပ်ကားလမ်းမှာ ဒီကနေ့မနက် ၇ နာရီကျော်လောက် မိုင်း ၂ လုံးဆွဲ တိုက်ခိုက်ခဲ့တာလို့ ပေါက်-PDF ရဲ့ ပြန်ကြားရေးတာဝန်ခံ ဗိုလ်တေဇက ပြောပါတယ်။

“စစ်ကောင်စီရဲ့ ထောက်ပို့ယာဥ်တန်း ၁၃ စီးထွက်လာတာဗျ။ ကား ၆ စီလောက်ကတော့ ရိက္ခာ ကားတွေဖြစ်ပြီး စစ်ကောင်စီတပ်သား အင်အားကတော့များတယ်၊ အတိကျတော့ ခန့်မှန်းဖို့ခက်တယ်။ ရှေ့ ၃ စီးကတော့ ကင်းထောက်အဖြစ် လာရောက်ကာ ကင်းပုန်းတွေ ချပြီးတော့မှ လာကြတာ၊ ကာတစ်စီးကတော့ ထိခိုက်သွားတယ်၊ ဒဏ်ရာရသူအရေတွက်ကိုတော့ မသိရသေးဘူး။ အကြမ်းဖက်စစ်အုပ်စုဘက်က ရမ်းသမ်းပြီးတော့ ပြန်လည်ပစ်ခတ်ပေမယ့်လည်း ကျနော်တို့ ပေါက် PDF ဘက်က အထိအခိုက် အကျအဆုံးမရှိဘဲ အောင်အောင်မြင်မြင် ဆုတ်ခွာနိုင်ခဲ့တယ်။” 

ဒါ့အပြင် ပေါက်မြို့နယ် ညောင်ပင်သာကျေးရွာ စာသင်ကျောင်း ကျောင်းအုပ်နဲ့ ဆရာမ ၃ ယောက်ကိုလည်း CDM ဆရာ/ဆရာမတွေကို စစ်ကောင်စီအလိုကျ Non CDM လုပ်ဖို့  စည်းရုံးခြိမ်းခြောက်နေတာ မရပ်တန့်ပါက ပြင်းပြင်းထန်ထန် အပြစ်ပေးသွားမယ်လို့ မနေ့က ရက်စွဲနဲ့ ထုတ်ပြန်ထားပါတယ်။

စစ်ကိုင်းတိုင်း၊ ဝက်လက်မြို့နယ် မန္တလေး-ရွှေဘိုလမ်းမကြီးတနေရာမှာလည်း ဒီဇင်ဘာ ၈ ရက်နေ့မနက် ၃ နာရီလောက်က စစ်ကောင်စီယာဉ်တန်းကို မြို့နယ်ပြည်သူ့ကာကွယ်ရေးတပ်ဖွဲ့တွေက မိုင်းဆွဲတိုက်ခိုက်ခဲ့ရာ စစ်သားအချို့နဲ့ ရိက္ခာတင်‌ ၁၂ ဘီးကား ၁ စီး ပျက်စီးသွားပြီး ထိခိုက်သေဆုံးမှုရှိတယ်လို့ သိရပါတယ်။

မြို့နယ်ပြည်သူ့ကာကွယ်ရေးတပ်ဖွဲ့တာဝန်ရှိသူတဦးက “ကျနော်တို့ မိုင်းဆွဲတယ်၊ ပစ်ခတ်တယ်၊ စစ်--တွေဘက်က ပြန်မပစ်နိုင်ဘူး၊ ၃ စီးမိုင်းမိတယ်။ ၁၂ ဘီးကားတစ်စီးကတော့ ဒီနေ့မနက် ၈ နာရီအထိ လာမသယ်နိုင်သေးဘူး၊ ထိခိုက်သေဆုံးတဲ့ အရေအ‌တွက်ကတော့ တိတိကျကျ မသိရဘူး” လို့ ပြောပါတယ်။

စစ်ကိုင်းဘက်ကလာတဲ့ စစ်ကောင်စီယာဉ်တန်းကို မန္တလေး-ရွှေဘို လမ်းကြီးပေါ်မှာ စစ်ကိုင်းခရိုင်တပ်ရင်း ၁ ဗိုလ်ယက္ခအဖွဲ့က ဗိုလ်ဇာတ်လိုက်တပ်စုနဲ့ ဝက်လက်မြို့နယ်က ပရိုလိုက်အဖွဲ့တို့က  ၇ ရက်နေ့ ည ၈ နာရီ၊ ည ၉ နာရီနဲ့ ဒီနေ့မနက် ၃ နာရီ စုစုပေါင်း ၃ ကြိမ် မိုင်းဆွဲတိုက်ခိုက်ခဲ့တာလို့ ဆိုပါတယ်။

ပြီးခဲ့တဲ့ နိုဝင်ဘာလ ၂၈ ရက်နေ့ကလည်း ဝက်လက်မြို့နယ် မန္တလေး-ရွှေဘိုလမ်းမကြီးပေါ်မှာ စစ်သား ၆၀ ခန့် တင်လာတဲ့ Express ယာဉ်တစ်စီးကို မြို့နယ် ပကဖ က မိုင်းဆွဲတိုက်ခိုက်ခဲ့လို့ စစ်သား ၃၀ လောက် ထိခိုက်ကျဆုံးခဲ့တယ်လို့ သိရပါတယ်။

ဒီမိုကရက်တစ်ပြောက်ကျားတပ်ဖွဲ့ (အောက်ချင်းတွင်း) ကလည်း စစ်ကိုင်းတိုင်း မုံရွာမြို့အဝင် စစ်ဆေးရေးဂိတ်ကို ဒီဇင်ဘာ ၈ ရက်မနက် ၅ နာရီဝန်းကျင်လောက်က ဖောက်ခွဲရေးနဲ့ အလစ်ငိုက် ဝင်ရောက်ပစ်ခတ်ခဲ့တာကြောင့် စစ်ကောင်စီတပ်သား ၃ ဦး သေဆုံးသွားတယ်လို့ ထုတ်ပြန်ထားပါတယ်။

အခုလိုတိုက်ခိုက်တာဟာ ရန်ကုန်၊ ကြည့်မြင်တိုင် အပြစ်မဲ့ဆန္ဒပြပြည်သူတွေကို ကားနဲ့တိုက် ဖြိုခွင်းတာနဲ့ ဆားလင်းကြီးမြို့နယ် ဒုန်းတောကျေးရွာက လက်နက်မဲ့ပြည်သူ ၁၁ ဦးကို မီးရှို့ သတ်ဖြတ်ခဲ့မှု သွေးကြွေးဆပ် လက်တုံ့ပြန်တာလို့ ဆိုပါတယ်။

စစ်ကောင်စီ စစ်ဆေးရေးဂိတ်နဲ့ ယာဉ်တန်းတွေ မိုင်းဆွဲတိုက်ခိုက်ခံရမှုကြောင့် သေဆုံး ဒဏ်ရာရမှုအခြေအနေကို ဒီဗွီဘီက သီးခြားအတည်မပြုနိုင်သေးပါဘူး။