မွန်ပြည်နယ်၊ သံဖြူဇရပ်မြို့နယ် စက်စဲလမ်းဆုံးအနီးမှာ ဒီကနေ့ နိုဝင်ဘာ ၂၀ ရက်နေ့ မနက် ၉ နာရီအချိန်ခန့်က ဘုရားဖူးသွားတဲ့ ကားတိမ်းမှောက်ကာ ၁ ဦး သေဆုံးပြီး ၈ ဦးဒဏ်ရာ ပြင်းထန်တယ်လို့ လူမှုကယ်ရေးအဖွဲ့တွေက DVB ကို ပြောပါတယ်။
မော်လမြိုင်ကနေ ကျိုက္ခမီကို ဘုရားဖူးသွားတဲ့ ဟိုက်ဂျက်အဖြူရောင်ကားဟာ စက်စဲလမ်းဆုံးအနီးမှာ လမ်းချော်တိမ်မှောက်ပြီး ရော်ဘာခြံအတွင်း ဝင်ရောက်သွားခဲ့တာ ဖြစ်ပါတယ်။
အဲဒီကားတိမ်းမှောက်မှုကြောင့် ကားခေါင်းခန်းထိုင် အမျိုးသား ၁ ဦး သေဆုံးခဲ့ပြီး၊ ၈ ဦး ပြင်းထန်ဒဏ်ရာတွေ ရရှိခဲ့ပါတယ်။
ပြင်းထန်ဒဏ်ရာရရှိသူ ၈ ဦးထဲမှာ အမျိုးသမီး ၃ ဦးဟာ အသက်အန္တရာယ် စိုးရိမ်ရတဲ့ အခြေအနေမှာ ရှိတယ်လို့ လူမှုကယ်ဆယ်ရေးအဖွဲ့ ဝင်တစ်ဦးက ပြောပါတယ်။
ကားတိမ်းမှောက်မှုကြောင့် သေဆုံးသွားတဲ့ အမျိုးသား အပါအဝင် ပြင်းထန်ဒဏ်ရာရသူ ၈ ဦးစလုံးကို သံဖြူဇရပ်ပြည်သူ့ဆေးရုံကနေ မော်လမြိုင်ပြည်သူ့ဆေးရုံကို လွှဲပြောင်း ပို့ဆောင်ထားပါတယ်။
သံဖြူဇရပ်မြို့နယ်မှာ ပြီးခဲ့တဲ့ ရက်ပိုင်းကလည်း ကားတိုက်မှုဖြစ်ခဲ့ပြီး ၅ ဦးထက်မနည်း သေဆုံးထားပါတယ်။
