မန္တလေးမြို့၊ မဟာအောင်မြေမြို့နယ် ၃၈ လမ်း၊ ၈၇ လမ်းနဲ့ ၈၈ လမ်းကြား၊ ရတနာပုံသာ (ဦးပေစိ) ဘုရားဝင်းအတွင်း စစ်ကောင်စီတပ်သားတွေ တပ်စွဲထားတဲ့နေရာမှာ နိုဝင်ဘာ ၁၉ ရက် ည ၇ နာရီဝန်းကျင်က ဗုံးနဲ့ ပစ်ခံရပြီး စစ်ကောင်စီတပ်သား ၂ ယောက် ပြင်းထန်ဒဏ်ရာရခဲ့တယ်လို့ သိရပါတယ်။
“ဦးပေစိ ဘုရားထဲမှာရှိတဲ့ စစ်သားတွေကို ဗုံးနဲ့ ပစ်သွားတာ။ ဗုံးကွဲတော့ အဲ့ဒီထဲကနေ ပြန်ပစ်တယ်။ လေး ငါး ဆယ် ချက်လောက်ရှိမယ်။” လို့ အနီးနားနေ ပြည်သူတဦး က ပြောပါတယ်။
GZP (Mandalay) ပြည်သူ့ကာကွယ်ရေးမြို့ပြပြောက်ကျားတပ်ဖွဲ့နဲ့ Black Image ပြည်သူ့ကာကွယ်ရေး မြို့ပြပြောက်ကျား တပ်ဖွဲ့တို့ ပူးပေါင်း တိုက်ခိုက်ခဲ့တာဖြစ်ပြီး ထိခိုက်ဒဏ်ရာရတာမရှိဘူးလို့ ထုတ်ပြန်ထားပါတယ်။
နိုဝင်ဘာ ၅ ရက်နေ့ကလည်း အကြမ်းဖက်စစ်ကောင်စီတပ်သားတွေ တပ်စွဲထားတဲ့ ရတနာပုံသာ (ဦးပေစိ) ဘုရား အနီး ပေါက်ကွဲမှုဖြစ်ခဲ့ပြီး ထိခိုက်ဒဏ်ရာရတာတော့ မရှိခဲ့ပါဘူး။
