မွန်ပြည်နယ်၊ ကျိုက်ထိုမြို့က လူမှုကယ်ဆယ်ရေးအသင်း ဥက္ကဋ္ဌအပါဝင် အသင်းသား ၅ ဦး ကို စစ်ကောင်စီက ဖမ်းဆီးသွားပြီး ၄ ရက် ကြာတဲ့အထိ ပြန်မလွှတ်ပေးသေးဘူးလို့ သိရပါတယ်။
ကျိုက်ထိုမြို့ လူမှုကယ်ဆယ်ရေးအသင်း ဥက္ကဋ္ဌ ဦးစိုးသီဟနဲ့ အသင်းဝင် ၄ ဦးတို့ကို နိုဝင်ဘာ ၁၅ ရက်က စစ်ကောင်စီက ဖမ်းဆီးသွားတာဖြစ်ပြီး ဘာကြောင့်ဖမ်းဆီးတယ်၊ ဘယ်မှာ ဖမ်းဆီးထားတယ်ဆိုတာ မသိရသေးပါဘူး။
အသင်းနဲ့ နီးစပ်သူတစ်ဦးက “ဒီနေ့ထိ ပြန်မလွတ်သေးဘူး။ ဘာကြောင့်ဖမ်းတယ်လို့ မသိရဘူး” လို့ ပြောပါတယ်။
ကျိုက်ထိုမြို့နယ်အတွင်းက လူငယ် ၇ ဦးထက် မနည်းကိုလည်း ဒေသခံပြည်သူ့ ကာကွယ်ရေးတပ်နဲ့ ဆက်သွယ်တယ်ဆိုပြီး နိုဝင်ဘာ ၁၄ ရက်က စစ်ကောင်စီတပ်ဖွဲ့ဝင်တွေက ဖမ်းဆီးသွားခဲ့တယ်လို့ ဒေသခံတွေက ပြောပါတယ်။
ကျိုက်ထိုမြို့နယ်မှာ ရပ်ကျေးအုပ်ချုပ်ရေးအဖွဲ့ဝင်တွေ၊ နိုင်ငံရေးပါတီဝင်တွေ သေနတ်နဲ့ ပစ်သတ်ခံရတာတွေရှိနေတဲ့အတွက် စစ်ကောင်စီတပ်က ရှာဖွေစစ်ဆေးမှုတွေ တင်းတင်းကျပ်ကျပ် လုပ်ဆောင်နေပါတယ်။
