စစ်ကောင်စီတပ်ရဲ့ ပစ်ခတ်မှုကြောင့် ဖယ်ခုံမြို့နယ်အပါအဝင် ကရင်နီဒေသမှာ ခရစ်ယာန်ဘုရားကျောင်း ၇ ကျောင်း ပျက်စီးသွားတယ်လို့ တိုးတက်သော ကရင်နီပြည်သူ့အင်အားစုက ထုတ်ပြန်ပါတယ်။
ဖယ်ခုံဘုရားကျောင်း၊ ကယန်းသာယာဘုရားကျောင်း၊ ဒီးမော့ဆို စိန့်ဂျိုးဇက်ဘုရားကျောင်း၊ ဒေါငံခါးငြိမ်းချမ်းရေး ဘုရင်မဘုရားကျောင်း၊ ဒီးမော့ဆို နှစ်ခြင်းဘုရားကျောင်း၊ ဖရူဆိုဘုရားကျောင်း၊ ၆ မိုင် ဘုရားကျောင်းတို့ကို စစ်ကောင်စီစစ်တပ်က လက်နက်ကြီးတွေနဲ့ ပစ်ခတ်ဖျက်ဆီးခဲ့တာလို့ ဆိုပါတယ်။
ကယန်းသာယာဘုရားကျောင်းကိုလည်း စစ်ကောင်စီတပ်က မေလ ၂၄ ရက်နေ့က ပစ်ခတ်ခဲ့ပြီး ဘုရားကျောင်းထဲ ပုန်းခိုနေတဲ့ ပြည်သူ ၄ ယောက် ပွဲချင်းပြီး သေဆုံးသွားခဲ့ပါတယ်။
ဖယ်ခုံဘုရားကျောင်းကို လက်နက်ကြီးတွေနဲ့ မေလ ၂၃ ရက်နေ့က တကြိမ်၊ နိုဝင်ဘာ ၉ ရက်နေ့ က တကြိမ် နှစ်ကြိမ် ပစ်ခတ်ခံရပြီး ပျက်စီးခဲ့ရပါတယ်။
အလားတူ ဒီးမော့ဆိုမြို့နယ် ၆ မိုင်ဘုရားကျောင်းကို စစ်ကောင်စီတပ်က စက်တင်ဘာ ၇ ရက်နေ့မှာ တကြိမ်၊ အောက်တိုဘာ ၁၅ ရက်နေ့မှာ တကြိမ် ပစ်ခတ်ခဲ့တယ်လို့ဆိုပါတယ်။ အဆိုပါ ၆ မိုင်ဘုရားကျောင်းကြီကို ပြီးခဲ့နစ်က သိန်းပေါင်း ၂၀၀၀ နီးပါးနဲ့ အသစ်တည်ဆောက်ထားတဲ့ဘုရားကျောင်းသစ်ဖြစ်ပြီး ဖွင့်ပွဲကိုမလုပ်ရသေးတဲ့ ဘုရားကျောင်း သစ်ဖြစ်ပါတယ်။
ဒီးမော့ဆို စိန့်ဂျိုးဇက်ဘုရားကျောင်းကိုလည်း မေလ ၂၆ ရက်နေ့က ပစ်ခတ်ခဲ့သလို ဒေါငံခါး ငြိမ်းခမ်းရေးဘုရင်မ ဘုရားကျောင်းကို လက်နက်ကြီးလက်နက်ငယ်တွေနဲ့ ဇွန်လ ၆ ရက်နေ့က ပစ်ခတ်ဖျက်စီးခဲ့တာလို့ ဆိုပါတယ်။
ဒီးမောဆို နှစ်ခြင်းဘုရားကျောင်းကိုလည်း ဇွန်လ ၁၅ ရက်နေက ပစ်ခတ်ဖျက်ဆီးခဲ့သလို ဖရူဆိုဘုရားကျောင်းကို အောက်တိုဘာ ၁၃ ရက်နေ့က လက်နက်ကြီးတွေနဲ့ ပစ်ခတ်ခဲ့တာလို့ ထုတ်ပြန်ချက်မှာ ပါရှိပါတယ်။
