ဧရာဝတီတိုင်း၊ ဝါးခယ်မမြို့နယ်မှာ နိုဝင်ဘာလ ၄ ရက်နေ့က ပြုလုပ်မယ့် အာဏာသိမ်းစစ်ကောင်စီကို ထောက်ခံတဲ့ တပ်ထောက်ခံပွဲ လူခေါ်မရတာကြောင့် ပွဲပျက်သွားတယ်လို့ သိရပါတယ်။
တပ်ထောက်ခံပွဲပြုလုပ်ဖို့ စစ်အုပ်စုထောက်ခံသူတွေက မြို့ပေါ်ရပ်ကွက်နဲ့ ကျေးရွာတွေမှာ လိုက်လံပြီး လမ်းဘေးဈေးသည်တွေနဲ့ ကွမ်းယာဆိုင်တွေမှာ ၁ ဦးကို ၁ သောင်းပေးမယ့်ပြောဆိုကာ စည်းရုံခဲ့ပေမယ့် လိုက်မယ့်သူမရှိတာကြောင့် ပွဲပျက်သွားတာလို့ ဒေသခံတွေက ပြောပါတယ်။
“သူတို့က လမ်းဘေးဈေးသည်ရော ကွမ်းယာရောင်းတဲ့သူပါ လိုက်ခေါ်တာ။ နောက်ဆုံး လိုက်မယ့်သူမရှိတော့ ပွဲပျက်သွားတာ။ ဒါတောင် ထပ်လုပ်ဖို့ အစီစဉ်ရှိတယ်ကြားတယ်” လို့ ဒေသခံတဦးက ပြောပါတယ်။
ဝါးခယ်မမြို့နယ်ထဲမှာ တပ်ထောက်ခံပွဲပြုလုပ်ဖို့အတွက် လူစည်းရုံရာမှာ လိုက်ခေါ်တဲ့သူတွေက လမ်းဘေး ဈေးသည်တွေနဲ့ ကွမ်းယာရောင်းသူတွေကို လိုက်အော်ရင် ၁ သောင်းပေးမယ်၊ အလံကိုင်ရင် ၁ သောင်းခွဲပေးမယ်ဆိုပြီး ပြောဆိုခဲ့တယ်လို့ ဆိုပါတယ်။
လူခေါ်မရတာကြောင့် နိုဝင်ဘာလ ၄ ရက်နေ့ ပြုလုပ်မယ့် တပ်ထောက်ခံပွဲ ပျက်ခဲ့ရပြီး နောက်ရက်ကို ပြန်လုပ်နိုင်ဖို့အတွက် စစ်ကောင်စီဩဇာခံဌာနဆိုင်ရာဝန်ထမ်းတွေကို မလိုက်မနေရသဘောမျိုး ဌာနအကြီးကဲတွေကတဆင့် ပြောဆိုတာတွေရှိနေတယ်လို့ သတင်းတွေထွက်ပေါ်နေပေမယ့် သီးခြားအပြုနိုင်ခြင်းမရှိသေးပါဘူး။
ဧရာဝတီတိုင်းအတွင်းက မြို့နယ်တော်တော်များများမှာ အာဏာသိမ်းစစ်ကောင်စီကို ထောက်ခံတဲ့ တပ်ထောက်ခံပွဲတွေကို အောက်တိုဘာလကုန်ပတ်ကစတင်ကာ ပြုလုပ်လာကြတာဖြစ်ပါတယ်။
