မကွေးတိုင်း၊ မကွေးမြို့နဲ့ တောင်တွင်းကြီးမြို့တွေမှာ ဆိုင်ကယ်ဆိုင်ကယ်ကို ၂ ယောက် စီးနင်းလာတဲ့ ဒေသခံပြည်သူတွေကို နိုဝင်ဘာ ၃ ရက်နေ့က အကြမ်းဖက်စစ် ကောင်စီတပ်သားတွေ ဖမ်းဆီးရိုက်နှက်နေတယ်လို့ ဒေသခံတွေဆီကသိရပါတယ်။
မကွေးဒေသခံတဦးက “ဆိုင်ကယ်ကို ၂ ယောက်မစီးရဘူးတဲ့လေ။ ညက လော်နဲ့လိုက်အော်တယ်။ စျေးဝယ်တို့၊ ကျန်းမာရေးတို့ ဘယ်လိုလုပ်ကြမလဲ။ ပြည်သူတွေကို စစ်တပ်က အရမ်းဒုက္ခပေးလွန်းနေပြီ” လို့ ပြောပါတယ်။
မကွေးမြို့ကို အနီးအနားကျေးရွာတွေက ဆိုင်ကယ် ၂ ယောက်စီးနင်းပြီး လာရောက်ကြတဲ့ပြည်သူတွေကို ဖမ်းဆီးရိုက်နှက်နေတာတွေရှိနေတယ်လို့ သိရပါတယ်။
မကွေးမြို့နဲ့ တောင်တွင်းကြီးမြို့တွေမှာ ဆိုင်ကယ်စီးနင်းသူတွေဟာ အမျိုးသားဆို ၁ ဦးတည်း၊ အမျိုးသမီးဆို ၂ ဦးသာ စီးနင်းဖို့ အကြမ်းဖက်စစ်ကောင်စီက ကန့်သတ်လိုက်တာလို့ ဒေသခံပြည်သူတွေက ပြောပါတယ်။
“လျှပ်စစ်ရုံးကို မီတာဆောင်လာတဲ့ ဆိုင်ကယ် ၂ ယောက်စီးလာတဲ့သူတွေကို စစ်သားတွေက ရိုက်နေတယ်။ ကြိုပြီးတော့လည်း ကြေညာမထားဘူး။ မြို့ပေါ်က လမ်းဆုံနေရာတွေမှာ ဖမ်းပြီးရိုက်နေတာဗျာ။ စစ်တပ်က တော်တော်ရမ်းကားနေပါပြီ” လို့ တောင်တွင်းကြီး ဒေသခံတဦးက ပြောပါတယ်။
တောင်တွင်းကြီးမြို့မှာ ပြီးခဲ့တဲ့လကတည်းက စစ်ကောင်စီရဲ့ ဆွေမျိုးတော်စပ်သူ အမျိုးသမီး ၁ ဦးနဲ့ ပြည်ခိုင်ဖြိုးပါတီအမာခံ စစ်ကောင်စီသတင်းပေး ၁ ဦးတို့ သေနတ်နဲ့ပစ်သတ်ခံရပြီးနောက် အကြမ်းဖက်စစ်ကောင်စီတပ်သားတွေက အပြစ်မဲ့ဒေသခံပြည်သူတွေကို ဖမ်းဆီးတာအပါအဝင် လူ့အခွင့်အရေးချိုးဖောက်မှုတွေကို နေ့စဉ်နဲ့အမျှ ပြုလုပ်နေတယ်လို့ ဒေသခံပြည်သူတွေဆီက သိရပါတယ်။
