မကွေးတိုင်းဒေသကြီး ပွင့်ဖြူမြို့နယ်မှာ အောက်တိုဘာ ၁၆ ရက်နေ့က မိုးသက်လေပြင်းကျရောက်ပြီး စန္ဒကူးနံ့ သာကျောင်းတော်ရာ ဘုရားရဲ့ ထီးတော်နဲ့ လူနေအိမ် ၂၀ လောက် ပျက်စီးခဲ့တယ်လို့ ဒေသခံတွေဆီကနေ သိရပါတယ်။
ပွင့်ဖြူမြို့နယ်မှာ မနေ့က တစ်ရက်လုံး မိုးသည်းထန်စွာရွာသန်ပြီးတော့ လေပြင်းကျရောက်တာကြောင့် ရွာသစ်ရွာ၊ ကျောင်းတော်ရာရွာ၊ ကုန်းဇောင်းရွာ၊ ကျောက်ပန်းတောင်းရွာနဲ့ ဘူးသည်ရွာတွေက လူနေအိမ် ၂၀ လောက် အမိုးလန်၊ သစ်ပင်ပိပြီး ပျက်စီးခဲ့တာကြောင့် ဘေးလွတ်ရာ ရွှေ့ပြောင်းထားရတယ်လို့ ဒေသခံတစ်ယောက်က ပြောပါတယ်။
စန္ဒကူးနံ့သာ ကျောင်းတော်ရာ စေတီတော်ရဲ့ ထီးတော်အထက်ပိုင်း မဏ္ဍိုင်မှာလည်း မိုးသက်လေပြင်းကျရောက်ပြီး အောက်ကို ကွေးသွားတယ်လို့ ဆိုပါတယ်။
ဒါ့အပြင် မိုးသက်လေပြင်းကျရောက်တာကြောင့် မကွေးမြို့က ရပ်ကွက်တစ်ချို့မှာလည်း ရေကြီးရေလျှံဖြစ်ပေါ်ကာ သစ်ပင်ကျိုးတာတွေနဲ့ အမိုးလန်တာတွေ ဖြစ်ပွားခဲ့တယ်လို့ မကွေးမြို့ခံတွေဆီကနေ သိရပါတယ်။
