ရှမ်းပြည်နယ် မိုင်းကိုင်မြို့နယ်မှာ အောက်တိုဘာ ၁၄ ရက်နေ့လယ်ပိုင်းက ကိုဗစ်-၁၉ ကူးစက်ခံရသူ ကိုယ်ဝန်ဆောင်အမျိုးသမီး တစ်ဦး ကလေးမွေးဖွားအပြီး သေဆုံးခဲ့ပါတယ်။
ကိုဗစ်-၁၉ ကြောင့် အသက်ရှူကြပ်ရောဂါခံစားနေရကာ ကိုယ်ဝန် ၈ လနဲ့ ကလေးမွေးဖွားအပြီး မကြာမီ သေဆုံးခဲ့တာလို့ ကျန်းမာရေးဝန်ထမ်းတစ်ဦးကပြောပါတယ်။
"ကိုယ်ဝန်ဆောင်မိခင်က ကိုဗစ်-၁၉ ရောဂါဖြစ်နေတယ်။ လွန်ခဲ့တဲ့တစ်ပတ်ကတည်းက အိမ်မှာ ကြိတ်ပြီးဆေးကုနေတာ။ ခု အသက်ရှူကြပ်ပြီး ဆေးရုံရောက်လာတယ်။ ကလေးကိုတော့ မွေးပေးနိုင်ခဲ့တယ်၊ မိခင်ကိုတော့ လက်လွှတ်လိုက်ရတယ်" လို့ မိုင်းကိုင်ဆေးရုံ ကျန်းမာရေးဝန်ထမ်းတစ်ဦးက ပြောပါတယ်။
ကိုယ်ဝန်ဆောင်ဟာ မိန်းကလေးတစ်ဦးကို မနက် ၁၁ နာရီခွဲမှာ မွေးဖွားအပြီး နေ့လယ် ၁ နာရီ ကိုဗစ်ကြောင့် သေဆုံးသွားကာ ကလေးကတော့ ကျန်းမာတယ်လို့ သိရပါတယ်။
မိုင်းကိုင်မြို့နယ်မှာ အောက်တိုဘာ ၁၄ ရက်နေ့အထိ ကိုဗစ်-၁၉ ရောဂါကူးစက်ခံရသူ ၁၁၅ ဦး၊ ဆေးကုသမှုခံယူနေသူ ၁၀ ဦး နဲ့ သေဆုံးသူ ၃ ဦးရှိပြီလို့ သိရပါတယ်။
