မကွေးတိုင်း၊ ထီးလင်းမြို့နယ်မှာ အောက်တိုဘာ ၁၄ ရက် ဒီနေ့မနက်ပိုင်းက ပျူစောထီးအဖွဲ့ဝင် အယောက် ၃၀ ဟာ တူမီးသေနတ် ၂၅ လက် အပ်နှံ အလင်းဝင်ခဲ့တယ်လို့ ထီးလင်း YDF တပ်ဖွဲ့ကနေ သိရပါတယ်။
ဇီးတောကျေးရွာက ပျူစောထီးအဖွဲ့ဝင် ၃၀ ဟာ လက်လုပ်တူမီးသေနတ် ၂၄ လက်နဲ့ ထိန်တိုင်းရွာက တူမီးသေနတ် ၁ လက်တို့နဲ့အတူ ဒီကနေ့ မနက် ၈ နာရီခွဲလောက်က ထီလင်း YDF တပ်ဖွဲ့ဆီ လာရောက်အပ်နှံခဲ့ပြီး စစ်အာဏာရှင်တော်လှန်ရေးမှာ ပြည်သူနဲ့အတူ ပူးပေါင်းပါဝင်မယ်ဆိုပြီး ကတိပြုခဲ့ကြတယ်လို့ ထီးလင်း YDF ခေါင်းဆောင်က ပြောပါတယ်။
ပထမအကြိမ် တူမီးသေနတ် အလက် ၂၀ သိမ်းဆည်းလိုက်တဲ့အချိန်မှာ ပျူစောထီးအဖွဲ့တွေ ဟာ စစ်ကောင်စီကို အကြောင်းကြားပေမယ့် စစ်ကောင်စီဘက်က လုံခြုံမှုမပေးတာကြောင့် ခိုကိုးရာမဲ့သွားပြီး လက်နက်တွေနဲ့အတူ YDFတပ်ဖွဲ့ဆီ အလင်းဝင်လာကြတာလို့ ဆိုပါတယ်။
ထီးလင်း-ဝါးရင်းချိုင် ကားလမ်းမှာလည်း အောက်တိုဘာ ၇ ရက်က အကြမ်းဖက် စစ်အုပ်စုကို YDF(ထီးလင်း)က မိုင်းဆွဲတိုက်ခိုက်ရာမှာ ရဲအရာရှိတစ်ယောက်အပါဝင် ရဲ ၄ ယောက်အပြင်းထန် ဒဏ်ရာရသွားပါတယ်။
စစ်ကောင်စီတပ်တွေက အပြင်းအထန် ထိုးစစ်ဆင်နေတာကြောင့် ထီးလင်းမြို့နယ်ထဲက မိဘပြည်သူတွေ အနေနဲ့ ထီးလင်း-ဂန့်ဂေါ လမ်းပိုင်းကို YDF တပ်ဖွဲ့ကို အသိမပေးဘဲ ဖြတ်သန်းသွားလာတာတွေ မပြုလုပ်ကြဖို့ သတိပေး ထုတ်ပြန်ထားပါတယ်။
Photo- Yaw Defense Force(YDF)
