ဧရာဝတီတိုင်းအစိုးရအဖွဲ့ရုံးမှာ စက်တင်ဘာလ ၂၈ ရက်နေ့က အစိုးရအဖွဲ့ရုံးမှာ တာဝန်ထမ်းဆောင်နေတဲ့ ဒုဦးစီးမှူး ဦးမိုးကိုကိုလွင်ကို အကြမ်းဖက်စစ်ကောင်စီတပ်တွေက ဝင်ရောက်ဖမ်းဆီးသွားတယ်လို့ သိရပါတယ်။
ရုံးမှာ ဒုဦးစီးမှူး ဦးမိုးကိုကိုလွင် အလုပ်လုပ်နေချိန် စစ်တပ်က အင်အား ၁၀ ယောက်လောက်နဲ့ရောက်လာပြီး ဝင်ရောက်ဖမ်းဆီးသွားတာလို့ လုံခြုံရေးအရ အမည်မဖော်လိုတဲ့ ရုံးဝန်ထမ်းတဦးက ပြောပါတယ်။
"သီးသန့်ရောက်လာတာမျိုးတော့မဟူတ်ဘူး အစကတည်းက စစ်သားတွေက ရုံးထဲမှာရှိတယ်။ သူ့ကို ရုံးထဲမှာဖမ်းခေါ်သွားတာ အစက ဘာမှန်းမသိဘူး၊ ဦးစီးခေါ်တယ်ဆိုလို့ သွားတာ အဲ့မှာဖမ်းသွားတာ။”
အကြမ်းဖက်စစ်အုပ်စုက ဦးမိုးကိုကိုလွင်ကို စစ်အုပ်စုခေါင်းဆောင် မင်းအောင်လှိုင် မကောင်းကြောင်းရေးသားထားတဲ့ ပိုစ့်ကို ကိုယ်ပိုင်အကောင့်မှာပြန်မျှဝေခဲ့မိတာကြောင့် ဖမ်းဆီးခဲ့တာလို့ ဆိုပါတယ်။
ကန်ကြီးထောင့်မြို့နယ်မှာလည်း စက်တင်ဘာလဆန်းပိုင်းက ဒုမြို့နယ်အုပ်ချုပ်ရေးမှူးဖြစ်သူကို အကြမ်းဖက်စစ်အုပ်စုက ဖမ်းဆီးခဲ့ပါသေးတယ်။
