မကွေးတိုင်း၊ မကွေးမြို့၊ ဆုံမန်ကျည်းပင်လမ်းဆုံမှာရှိတဲ့ မကွေးအမှတ် ၂ ရဲစခန်းဝန်းအတွင်းမှာ စက်တင်ဘာလ ၂၈ ရက်နေ့ ညနေ ၄ ဝန်းကျင်လောက်က ဗုံး ၁ လုံး ပေါက်ကွဲခဲ့တယ်လို့ ဒေသခံတွေဆီက သိရပါတယ်။

အမှတ် ၂ ရဲစခန်းအနီးနေ ဒေသခံတဦးက “ဗုံးသံကြီးကတော့ အကျယ်ကြီးပဲ။ ရဲစခန်းဝန်းထဲမှာ ပေါက်ကွဲတာဆိုတော့ ဘာဖြစ်သွားတယ်ဆိုတာ မသိရဘူး။ လူနာတင်ယာဉ်တွေသွားတာတော့ မတွေ့ဘူး။ ဗုံးပေါက်ပြီး အကြမ်းဖက်စစ်သားတွေကတော့ အစစ်အဆေးအရမ်းကြမ်းနေတယ်” လို့ ပြောပါတယ်။

ဗုံးပေါက်ကွဲမှုနဲ့ပတ်သက်ပြီး အသေးစိတ်သိရှိနိုင်ဖို့ မကွေး၊ အမှတ် ၂ ရဲစခန်းကို ဒီဗွီဘီက ဖုန်းဆက်သွယ်မေးမြန်းခဲ့ပေမယ့် လက်ခံဖြေဆိုခြင်းမရှိခဲ့ပါဘူး။

အဆိုပါဗုံးပေါက်ကွဲမှုကို No Chair ပြောက်ကျားအဖွဲ့ကပြုလုပ်ခဲ့တာဖြစ်ပြီး အကြမ်းဖက်စစ်ကောင်စီ ပြုတ်ကျသည်အထိ ဆက်လက်တိုက်ခိုက်သွားမှာဖြစ်တဲ့အတွက် ပြည်သူတွေအနေနဲ့ စစ်ကောင်စီတပ်ဖွဲ့တွေအပါအဝင် သူတိုနဲ့နီးစပ်သူတွေနဲ့ နီးနီးကပ်ကပ်မနေကြဖို့ သတိပေးချက်ထုတ်ပြန်ထားပါတယ်။