ရှမ်းပြည်နယ်၊ မြောက်ပိုင်းမိုးမိတ်မြို့နယ်၊ မြစ်ဆုံကျေးရွာက နမ့်မိတ်ချောင်းကြိုးတံတား စက်တင်ဘာ ၂၀ ရက်နေ့က ရေနဲ့မျောပါ ပျက်စီးသွားတာကြောင့် ကမ်းတဘက်မှာရှိတဲ့ တောင်သူတွေအနေနဲ့ လမ်းပန်းဆက်သွယ်ရေး အခက်ခဲဖြစ်နေပါတယ်။
"တဘက်ကမ်းက တောင်သူတွေက သယ်ယူပို့ဆောင်ရေးအတွက် ဒီတံတားကိုအဓိကထားသုံးကြတာ။ အခုက တံတားမျောပါသွားတော့ သယ်ယူပို့ဆောင်ရေး ကအခက်ခဲ ဖြစ်နေတယ် "လို့ ဒေသခံရွာသားတစ်ဦးက ဆိုပါတယ်။
နမ့်မိတ်ချောင်းကြိုးတံတားကို မြစ်ဆုံကျေးရွာနဲ့ တဘက်ကမ်းက နန်းပန်းကျေးရွာ၊ ခတ်ခိုးကျေးရွာ၊ ဖန်းခါးကျေးရွာတွေမှာရှိတဲ့ ယာခင်းစိုက်တောင်သူတွေ၊ ရွှေတောတွေက ပြည်သူတွေနဲ့ တောင်သူတွေ အဓိကထားအသုံးပြုနေရတယ်လို့ ဆိုပါတယ်။
ဒေသခံတစ်ဦးက "တံတားက ရေတိုးတော့ ရေနဲ့မျောပြီးပျက်စီးသွားတယ်။ အခုကသွားလို့မရတဲ့အခြေနေမှာရှိနေတယ်။ မိုးကတော့တိတ်သွားပြီ"လို့ ပြောပါတယ်။
အရှည် ပေ ၇၈၀ ၊ အကျယ် ၉ ပေနဲ့ အမြင့် ၁၂ ပေရှိတဲ့ နမ့်မိတ်ချောင်းကြိုးတံတားကို ၂၀၂၁ ဇန်နဝါရီလကစပြီး ပြည်နယ်အစိုးရထောက်ပံ့ငွေနဲ့ ပြည်သူတွေထည့်ဝင်ငွေ ပေါင်းပြီး ပြန်လည်ပြုပြင် တည်ဆောက်ထားတာပါ။
