ချင်းပြည်နယ်၊ ဟားခါးမြို့မှာ စက်တင်ဘာ ၁၈ ရက်နေ့ညဦးပိုင်းက မြို့ပေါ်ရပ်ကွက်တခုမှာ ပေါက်ကွဲမှုဖြစ်ပွားခဲ့ပြီး ပစ်ခတ်သံတွေ ထွက်ပေါ်လာကာ နေအိမ်တလုံး မီးလောင်ခဲ့ပါတယ်။ 

ပစ်ခတ်မှုကြောင့် အရွယ်မရောက်သေးသူတွေအပါအဝင် အနည်းဆုံး သုံးဦး ထိခိုက်ဒဏ်ရာရရှိထားတယ်လို့ ဒေသခံ သတင်းမီဒီယာတခုက ဖော်ပြထားပြီး အသေးစိတ်ကိုတော့ မသိရှိရသေးပါဘူး။ 

မနေ့ နေ့လယ်ပိုင်းကလည်း ဟားခါးနဲ့မဝေးလှတဲ့ ထန်တလန်မြို့မှာ စစ်တပ်ကလက်နက်ကြီး၊ လက်နက်ငယ်တွေနဲ့ ပစ်ခတ်မှုကြောင့် နေအိမ် ၁၉ လုံး မီးလောင်ခဲ့တယ်လို့ ချင်းသတင်းဌာနတွေက အတည်ပြုပါတယ်။ မနေ့က ပစ်ခတ်ခံရမှုကြောင့် သေဆုံးသွားတဲ့  သင်းအုပ်ဆရာ ပါစတာရဲ့ ဘယ်ဘက် လက်သန်းကြွယ်မှာ ဝတ်ဆင်ထားတဲ့ လက်စွပ်ကိုလည်း လက်ချောင်းဖြတ်ပြီး ယူသွားတယ်လို့ သိရပါတယ်။ ဒါ့အပြင် ထန်တလန်နှင့် ဟားခါးမြို့တွေကို အ‌မြှောက်နဲ့ ထုတာတွေရှိတယ်လို့လည်း သိရပါတယ်။