အိမ်ထောင်သည်ရဲမေများပါ လက်နက်တပ်ဆင်ထားရန် စစ်ကောင်စီညွှန်ကြား
DVB
·
September 16, 2021
ကရင်ပြည်နယ်နဲ့ မွန်ပြည်နယ်မှာရှိနေတဲ့ စစ်ကောင်စီအမြောက်စခန်းတွေကို ပြည်သူ့ကာကွယ်ရေးတပ် PDF က ဦးတည်တိုက်ခိုက်မယ်ဆိုတဲ့သတင်းကြိုရတာကြောင့် အဲဒီပြည်နယ်တွေက တပ်စခန်းတွေ ဂရုစိုက်ဖို့နဲ့ အိမ်ထောင်သည် ရဲမေတွေကိုပါ လက်နက်တပ်ဆင် ပေးထားဖို့ အရှေ့တောင်တိုင်းစစ်ဌာနချုပ်က ညွှန်ကြားထားပါတယ်။
ညွှန်ကြားထားတဲ့ ကြေးနန်းထဲမှာ PDF တွေ တိုက်ခိုက်လာတဲ့အခါ ဘယ်လိုပြန်လည်တုန့်ပြန်မလဲဆိုတာကို တပ်နယ်မှူးတွေက မြေပြင်အခြေအနေကို သုံးသပ်ပြီး ရန်သူလုပ်ဆောင်လာနိုင်တဲ့နည်းလမ်း၊ ကိုယ့်ဘက်က ပြန်လည်တုံ့ပြန်တိုက်ခိုက်မယ့် နည်းလမ်း တွေကို စစ်တင်ဘာ ၁၅ ရက်နေ့ ပြန်တင်ပြဖို့ ဆိုတဲ့ အကြောင်းလည်း ပါရှိပါတယ်။
အဲဒီအပြင် လူလက်နက် ခဲယမ်း ဖွဲ့စည်းပုံနဲ့ လက်နက်တပ်ဆင်ထားမှု မြေပုံအစီအမံတွေကိုလည်း ပေးပို့ရမယ်လို့ ညွှန်ကြားခဲ့ပါတယ်။
