ရန်ကုန်၊ စမ်းချောင်းမြို့နယ်မှာ စက်တင်ဘာ ၉ ရက်  ဒီနေ့ ညနေ စစ်ကားတစ်စီး ဗုံးခွဲတိုက်ခိုက်ခံရပြီးနောက် စစ်ကောင်စီတပ်တွေက  FoodPanda ပို့တဲ့ဝန်ထမ်းနဲ့  လူငယ်တချို့ကို အကြမ်းဖက်ဖမ်းဆီး စစ်ဆေးနေပါတယ်။ 

လက်ရှိအချိန်အထိ FoodPanda ပို့ဝန်ထမ်းတစ်ဦးအပါအဝင် လူငယ် သုံးဦးထက်မနည်းဖမ်း ဆီးစစ်ဆေးခံထားရတယ်လို့ ဒေသခံတွေက ပြောပေမဲ့ အသေးစိတ်ကို အတည်မပြုနိုင်သေးပါဘူး။ 

စမ်းချောင်းမြို့နယ်မှာ ဒီနေ့ညနေ ၄ နာရီလောက်က စစ်ကားတစ်စီး ဗုံးခွဲခံရပြီးနောက် စစ်ကောင်စီတပ်ကဗားကရာအနီး ကိုးထပ်ကြီးဘုရားဝန်းကျင်၊ ဗဟိုလမ်း၊ ရှမ်းလမ်း၊ ဟံသာဝတီဂတ်စ်ဆိုင်ရှေ့၊ ဆင်မလိုက်ဈေးနားတို့မှာ ပိတ်ဆို့စစ်ဆေးနေသလို လှည့်လည်စစ်ဆေးနေတာတွေလည်း ရှိနေတယ်လို့သိရပါတယ်။

စမ်းချောင်းမှာနေထိုင်သူတစ်ဦးက “တောက်လျှောက်ကားတွေနဲ့ပတ်နေပြီး ပစ်သံတွေကတော့ ၄ နာရီကျော်လောက်က တောက်လျှောက်ကြားရတယ်။ အခုတော့ ပစ်သံမကြားတော့ဘဲ အပြင်လည်းမထွက်ရဲတော့ဘူး”လို့  ပြောပါတယ်။

စစ်ကားကို အမည်မသိအဖွဲ့က လက်ပစ်ဗုံးပစ်သွင်းဖောက်ခွဲခဲ့တာဖြစ်ပြီး စစ်သား ၂ ဦးသေဆုံးကာ တချို့ဒဏ်ရာရရှိသွားတယ်လို့ မြေပြင်သတင်းတွေအရ သိရပါတယ်။

စမ်းချောင်းမြို့နယ်မှာနေထိုင်သူတစ်ဦးက “စစ်ကားသွားနေတုန်း ဗုံးလှမ်းထည့်တာ။ ၂ ဦးသေတယ်ကြားတယ်  ဒဏ်ရာရတဲ့သူလည်း  ရှိတယ် အခု ကားတွေတားပြီးစစ်နေတယ်၊ လမ်းတွေထဲအထိ လူတွေကို လိုက်ရှာနေကြတယ် သေနတ်ပစ်သံတွေလည်းကြားတယ်”လို့ ဒီဗွီဘီကို ပြောပါတယ်

လက်ရှိမှာတော့ စမ်းချောင်းမြို့နယ်တွင်း လမ်းတွေပိတ်ဆို့ထားပြီး ဖြတ်သန်းသွားလာတဲ့ ကားတွေနဲ့ လူငယ်တွေကို စစ်ဆေးနေတယ်လို့  ဒေသခံ ပြည်သူတစ်ဦးက ပြောပါတယ်။