မန္တလေးတိုင်း၊ မိုးကုတ်မြို့က နေရာ ၂ ခုမှာ စက်တင်ဘာ ၃ ရက်က ဒီကနေ့ ဗုံးပေါက်မှုဖြစ်ခဲ့ပြီး လူတွေ ထိခိုက်ဒဏ်ရာရတာ မရှိဘူးလို့ ဒေသခံတွေဆီက သိရပါတယ်။
ဒီမနက် ၉ နာရီဝန်းကျင်က မြို့နယ်လျှပ်စစ်ရုံးဝန်းထဲ ဗုံးပေါက်ခဲ့ပြီး နေ့လယ် ၂ နာရီ ဝန်းကျင်မှာ မြို့နယ်စည်ပင်ရုံးအနီး ဗုံးပေါက်ကွဲခဲ့တာပါ။
"မနက်က လျှပ်စစ်ရုံးထဲကွဲတယ်၊ လူအထိအခိုက်တော့မကြားဘူး ၊ ခုနေ့လယ်က စည်ပင်ရုံးနားကွဲတယ်။ မှန်တွေ လမ်းမပေါ် အကုန်လွင့်သွားတယ်၊ ထိခိုက်တာတော့ မကြားသေးဘူး"လို့ဒေသခံတစ်ဦးကဆိုပါတယ်။
အဆိုပါ ပေါက်ကွဲမှုနဲ့ ပတ်သက်ပြီး ဘယ်အဖွဲ့ကမှ သူတို့ရဲ့ လက်ချက်လို့ ကြေညာတာ မရှိသေးပါဘူး။
မိုးကုတ်မြို့မှာ စက်တင်ဘာ ၁ ရက်က မြို့နယ်လျှပ်စစ်မီတာရုံးကနေ မီတာဆောင်ကြဖို့ မီတာ စာရွက်တွေ လိုက်ဝေနေခဲ့ပြီး စည်ပင်ရုံးကလည်း အခွန်တွေ ကောက်နေတယ်လို့ ဒေသခံတွေဆီကပြောပါတယ်။
မန္တလေးတိုင်းအတွင်းမှာ ဖေဖော်ဝါရီ ၁ ရက် စစ်အာဏာသိမ်းပြီးကတည်းက ဩဂုတ် ၂၆ ရက်အထိ ဗုံးပေါက်ကွဲမှုပေါင်း ၄၆၇ ကြိမ်ဖြစ်ပွားပြီး သေဆုံးသူ ၁၂၆ ဦးရှိခဲ့တယ်လို့ စစ်ကောင်စီ ပြန်ကြားရေး ဒုဝန်ကြီးက ပြီးခဲ့တဲ့ နေပြည်တော် သတင်းစာရှင်းလင်းပွဲမှာ ပြောထားပါတယ်။
