ပုလဲမြို့နယ်၊ ရေသာရွာနဲ့ ဆည်ကြီးရွာအကြား အကြမ်းဖက်စစ်ကောင်စီတပ်နဲ့ ပုလဲဒေသခံ PDF ပြောက်ကျားတပ်တို့ တိုက်ပွဲဖြစ်ပြီး စစ်ကောင်စီတပ်ဖွဲ့ဝင် ၁ ဦး သေဆုံးတယ်လို့ ဒေသခံတွေက ပြောပါတယ်။
တိုက်ပွဲဖြစ်ပွားခဲ့တဲ့ စစ်ရင်ကျေးရွာကနေ အကြမ်းဖက်စစ်ကောင်စီတပ်ဖွဲ့ဝင်တွေဟာ ဩဂုတ်လ ၃၁ ရက်နေ့မှာ စစ်ရင်ရွာရဲတောင်ဘက်ကို စစ်ဆင်ရေးပြုလုပ်လာတာကြောင့် ညနေ ၅ နာရီကျော်လောက်မှာ ဒေသခံပြည်သူကာကွယ်ရေးတပ်မတော် ပုလဲမြို့နယ် PDF ပြောက်ကျားအဖွဲ့နဲ့ တောင်ရင်း ဆည်ကြီးကြား မှန်တောပြင်မှာ တိုက်ပွဲဖြစ်ပွားခဲ့တယ်လို့ ဒေသခံ တစ်ဦးက ပြောပါတယ်။
“ကျနော်တို့ PDF အဖွဲ့က မိုင်းဆွဲတိုက်ခိုက်ခဲ့တာ။ အဲဒီနောက် တိုက်ပွဲ ၁၅ မိနစ်လောက်ဖြစ်ခဲ့တယ်။ စစ်ကောင်စီဘက်က ၁ ဦး ကျဆုံးတာကတော့ ကျနော်တို့ အတည်ပြုလို့ရတယ်။ ဒဏ်ရာရသူလည်း များနိုင်တယ်။ ဒဏ်ရရသူ ဘယ်လောက်ရှိ မလဲတော့ ကျနော်တို့ အတည်မပြုနိုင်ဘူး။ ထုံးစံအတိုင်းပဲ ဒီကောင်တွေ အနီးအနားကို ရမ်းပစ်တာတွေ ရှိတယ်။ ကျနော်တို့ PDF အဖွဲ့ကတော့ ထိခိုက်ဒဏ်ရာရသူ မရှိခဲ့ဘူး။”
စစ်ကောင်စီအကြမ်းဖက်စစ်တပ်ဟာ ပုလဲမြိုနယ်အတွင်း စစ်ကြောင်းများ အဖွဲ့နှစ်ဖွဲ့ခွဲပြီး လှုပ်ရှားနေကာ နှစ်ဖက်တင်းမာမှုကတော့ လက်ရှိအချိန်ရှိနေဆဲဖြစ်ပါတယ်။ တိုက်ပွဲဖြစ်ပွားမှုနဲ့ သေဆုံးဒဏ်ရာရမှု အခြေအနေတွေကိုတော့ စစ်ကောင်စီဘက်က သတင်းထုတ်ပြန်တာ မရှိသေးပါဘူး။
