ဖားကန့်လုံးခင်းရတနာမြေအတွင်း ဆက်သွယ်ရေးအင်တာနက်လိုင်းအချို့ကို အာဏာသိမ်းစစ်ကောင်စီက ဩဂုတ် ၂၀ ရက်ည ၈ နာရီနောက်ပိုင်း စတင်ထိန်းချုပ်ကန့်သတ်လိုက်တယ်လို့ ဒေသခံတွေက ပြောပါတယ်။

ဒေသခံတစ်ဦးက “၈ နာရီဝန်းကျင်ခန့်က စဖြတ်လိုက်တာ။ ဝိုင်ဖိုင်ကော၊ ဖုန်းအင်တာနက်ကော မရတော့ဘူး။ ဖုန်းလိုင်းတောင် တိုင်အပြည့်မရှိဘူး။ တစ်ခုခုဖြစ်လာမလား ဆိုပြီး လူတွေကတော့ စိုးရိမ်နေကြတယ်” လို့ ပြောပါတယ်။

ကချင်ပြည်နယ် ဖားကန့်လုံးခင်းရတနာမြေမှာ MPT၊ Telenor (Myanmar)၊  WiFi လိုင်းတချို့တွေ အားလုံးကို ည ၈ နာရီနောက်ပိုင်းမှ စတင်ပြီး ဖြတ်တောက်လိုက်တာ ဖြစ်ပါတယ်။

ဩဂုတ် ၂၁ ရက်ကစပြီး ဖားကန့်လုံးခင်းရတနာမြေက အင်တာနက်လိုင်းအားလုံးကို ဖြတ်တောက်သွားမယ်လို့ သတင်းရရှိထားပေမယ့် သီးခြားအတည်ပြုနိုင်ခြင်း မရှိသေးပါဘူး။