စစ်ကိုင်းတိုင်း ကလေးမြို့မှာ နှစ်ဖက်တပ်တွေ သြဂုတ် ၁၂ ရက် မွန်းလွဲပိုင်းက တိုက်ပွဲဖြစ်ပွားပြီး စစ်ကောင်စီတပ်သား အနည်းဆုံး ၃ ဦး သေဆုံးခဲ့ပြီး ကလေးပြည်သူ့ကာကွယ်ရေး (PDF) ဘက်က ၁ ဦး ဒဏ်ရာရရှိခဲ့တယ်လို့ သိရပါတယ်။
စစ်ကောင်စီတပ်ဟာ ကလေးမြို့ ပန်းမွန်ချောင်းကျေးရွာရဲ့ တောင်ဘက်ကြောတလျှောက်မှတဆင့် ချောင်းခွ နတ်ချောင်းကို လာရောက်စဉ် ကလေး PDF တပ်ဖွဲ့က မနေ့ မွန်းလွဲ ၂ နာရီခွဲ လောက်ကစတင်ပြီး ပိတ်ဆို့တိုက်ခိုက်ခဲ့ရာ ည ၈ နာရီလောက်အထိ တိုက်ပွဲဖြစ်ပွားခဲ့တာလို့ ကလေး PDF က ထုတ်ပြန်ပါတယ်။
တိုက်ပွဲအတွင်း စစ်ကောင်စီဘက်က အနည်းဆုံး ၃ ဦးသေဆုံးခဲ့ပြီး လက်နက်ကြီးနဲ့ ပစ်ခတ်ခံရမှုကြောင့် ကလေး PDF တပ်ဖွဲ့ဝင်တစ်ဦး ဒဏ်ရာရရှိခဲ့တယ်လို့ ထုတ်ပြန်ထားပါတယ်။
စစ်ကောင်စီတပ်ဟာ ကလေးမြို့နယ်တောင်ပိုင်း နတ်ချောင်းရွာအတွင်းကိုလည်း သြဂုတ် ၁၁ ရက်နေ့က အကြမ်းဖက်ဝင်ရောက်စီးနင်းရှာဖွေခဲ့ကြတယ်လို့ ဆိုပါတယ်။
နတ်ချောင်းကျေးရွာမှာ တပ်စွဲထားတဲ့ စဖက်စစ်ကောင်စီတပ်ဖွဲ့တွေနဲ့ ထိတွေ့မှုတွေ ဆက်လက်ဖြစ်ပေါ်နိုင်တာကြောင့် ကလေး-ဂန့်ဂေါအကြား သွားလာနေတဲ့ ကားတွေ မှန်ချမောင်းနှင်သွားလာဖို့နဲ့ ဒေသခံပြည်သူတွေ လုံခြုံရေး အသိ၊ သတိရှိစွာနဲ့ နေထိုင်သွားလာဖို့ ကလေး PDF က အသိပေးထုတ်ပြန်ထားပါတယ်။
တိုက်ပွဲဖြစ်ပွားမှုနဲ့ပတ်သက်ပြီး အာဏာသိမ်းစစ်ကောင်စီဘက်က သတင်းထုတ်ပြန်တာတော့ မရှိသေးပါဘူး။
