ကယားပြည်နယ်အတွင်း အကြမ်းဖက်စစ်ကောင်စီတပ်ရဲ့ အဆက်မပြတ် ထိုးစစ်ဆင်မှု ကြောင့် ဩဂုတ် ၉ ရက်နေ့ တရက်တည်း ကရင်နီတပ်မတော် (KA)၊ ကရင်နီအမျိုးသား ကာကွယ်ရေးတပ် (KNDF) ပူးပေါင်းတပ်နဲ့ အကြမ်းဖက်စစ်ကောင်စီတပ်တို့အကြား တိုက်ပွဲ ၃ ကြိမ်ဖြစ်ပွားခဲ့တယ်လို့ KNDF က သတင်းထုတ်ပြန်ပါတယ်။
ဖရူဆိုမြို့နယ် အနောက်ဘက်ခြမ်း ဒိုမိုခိုကျေးရွာနဲ့ ဘီယာကျေးရွာအကြားမှာ စစ်ကောင်စီတပ်က အင်အား ၃၀၀ လောက်ရှိတဲ့ စစ်ကြောင်း ၃ ကြောင်းနဲ့ ထိုးစစ်ဆင်လာတာကို ကရင်နီ ပူးပေါင်းတပ်တွေက ခုခံတိုက်ခိုက်ခဲ့ပြီး နေ့လယ် ၂ နာရီလောက်မှာ တစ်ကြိမ်၊ ညနေ ၅ နာရီခွဲမှာ တစ်ကြိမ် တိုက်ပွဲဖြစ်ပွားခဲ့တယ်လို့ ဖော်ပြပါတယ်။
ဒါ့အပြင် ဖယ်ခုံမြို့နယ် ခေါင်းအိနဲ့ လဝဲကျေးရွာအနီးမှာ ပင်လောင်းဘက်ကနေ စစ်ကြောင်း ချီလာတဲ့ စစ်ကောင်စီတပ်ကို KNDF က ပိတ်ဆို့တိုက်ခိုက်ခဲ့တဲ့အတွက် ညနေ ၅ နာရီခွဲမှာ တိုက်ပွဲ ထပ်မံဖြစ်ပွားခဲ့တယ်လို့ ဖော်ပြပါတယ်။
ဩဂုတ်လ ၈ ရက်နေ့ကလည်း ဖရူဆိုမြို့နယ်အနောက်ဘက်ခြမ်းမှာ စစ်ကောင်စီတပ်တွေနဲ့ ကရင်နီပူးပေါင်းတပ်တို့အကြား တိုက်ပွဲဖြစ်ပွားခဲ့ပြီး စစ်ကောင်စီတပ်က ဆယ်ဦးထက်မနည်း သေဆုံးပြီး ထိခိုက်ဒဏ်ရေရသူတွေလည်း ရှိတယ်လို့ KNDF က ထုတ်ပြန်ထားပါတယ်။
အခုရက်ပိုင်း စစ်ကောင်စီတပ်ဘက်က ကယားပြည်နယ်အတွင်း အင်အားအများအပြား ဖြည့်တင်းနေတဲ့အတွက် ကရင်နီပူးပေါင်းတပ်တွေနဲ့ တိုက်ပွဲဖြစ်ပွားနေပြီး ဒေသခံပြည်သူတွေလည်း ဘေးလွှတ်ရာကို ထပ်မံထွက်ပြေးတိမ်းရှောင်နေကြရပါတယ်။
