ဖားကန့်တွင် စစ်ကောင်စီစစ်ကြောင်း တိုက်ခိုက်ခံရ၊ ၁၅ ဦးသေဆုံး
DVB
·
July 15, 2021
ကချင်ပြည်နယ်၊ ဖားကန့်မြို့နယ်ကို ဇူလိုင် ၁၄ ရက်နေ့ ညနေပိုင်းက တက်လာခဲ့တဲ့ အာဏာသိမ်းစစ်ကောင်စီရဲ့ စစ်တပ်ကို ကချင်လွတ်လပ်ရေးတပ်မတော် (ကေအိုင်အေ) က ကြားဖြတ်တိုက်ခဲ့တာကြောင့် စစ်သား ၁၅ ဦးသေဆုံးခဲ့တယ်လို့ သိရပါတယ်။
စစ်ကောင်စီရဲ့တပ်ကို ဂေါ်လိုယန်ကျေးရွာ တံတားညီနောင်နား ဖုန်းတာဝါတိုင်အနီးမှာ ညနေ ၄ နာရီဝန်းကျင်က ကြားဖြတ်တိုက်ခဲ့တာလို့ ဒေသခံတွေကပြောပါတယ်။
"ဖြစ်တာကတော့ နှစ်ဖက်အပြန်အလှန်ပစ်တာ အသံတွေကြားနေရတယ်၊ စစ် (..) တွေဘက်က ခန့်မှန်း ၁၅ ယောက်လောက်သေတာကြားတယ်''လို့ပြောပါတယ်။
ဖုန်းတာဝါတိုင်နားမှာ မိနစ် ၂၀ လောက်အပြန်အလှန်ပစ်ခတ်မှုတွေဖြစ်ပြီးနောက်ပိုင်း ကေအိုင်အေ ဘက်က တပ်ပြန်ဆုတ်သွားတယ်လို့ ဆိုပါတယ်။
ကချင်ပြည်နယ်၊ ဖားကန့်မြို့နယ်မှာ စစ်တပ်အာဏာသိမ်းပြီးနောက်ပိုင်း မေလပိုင်းက စတင်ကာ အပြန်အလှန်ထိတွေ့ပစ်ခတ်မှုတွေပိုဖြစ်လာတာဖြစ်ပါတယ်။
