ဧရာဝတီတိုင်း၊ ပုသိမ်မြို့နယ်အတွင်းက ချောင်းသာကမ်းခြေမှာ ဇူလိုင် ၉ ရက်နေ့က စတင်ပြီး မီတာမဆောင်တဲ့ နေအိမ်တွေကို စစ်ကောင်စီက မီးလိုက်ဖြတ်နေတယ်လို့ သိရပါတယ်။
မီတာမဆောင်တဲ့ နေအိမ်တွေကို လျှပ်စစ်မီတာစာရေးတွေနဲ့ စစ်ကောင်စီရဲ့ လက်နက်ကိုင်တွေလိုက်ပါကာ မီတာလိုက်ဖြတ်ခဲ့တာလို့ ဒေသခံတွေက ပြောပါတယ်။
ဒေသခံတဦးက "မီတာမဆောင်တဲ့ အိမ်တွေကို ပထမလိုက်သတိပေးထားတာရှိတယ်၊ ဒီဘက်ကလည်း ဒီအစိုးရကို ဆောင်စရာမလိုဘူးဆိုပြီ လုံးဝ မဆောင်ကြတာ၊ အဲ့ဒါ မနေ့က မီးတွေလိုက်ဖြတ်သွားတာ'' လို့ DVB ကိုပြောပါတယ်။
ချောင်းသာကမ်းခြေက အမှတ် ၁၊ ၂၊ ၃ ရပ်ကွက်တွေမှာ မီတာမဆောင်တဲ့ အိမ် ၅၀ လောက်ကို စစ်ကောင်စီက မနေ့ကစတင်ကာ မီးလိုက်ဖြတ်ခဲ့တာလို့ ဆိုပါတယ်။
မီးလိုက်ဖြတ်ခံရတဲ့ တချို့နေအိမ်တွေမှာ လူမရှိတာ မျိုးတွေနဲ့ မီတာဆောင်ရင် မဖြတ်ဘူး ပြောချိန်မှာလည်း ဖြတ်ချင်ဖြတ် မဆောင်နိုင်ဘူးလို့ ပြန်ပြောပြီး အဖြတ်ခံခဲ့တာတွေ ရှိတယ်လို့ သိရပါတယ်။
