အာဏာသိမ်းစစ်ကောင်စီရဲ့ မတရားဖမ်းဆီးခြင်းခံခဲ့ရတဲ့ ပုသိမ်ပြည်သူ့ဆေးရုံအုပ်ကြီး ဒေါက်တာ သန်းမင်းထွဋ် အမှုကို တရားလိုဘက်က ရုတ်သိမ်းဖို့အတွက် တရားရုံးကို တင်ပြထားတယ်လို့ သိရပါတယ်။
ပင်းတယမီးအိမ်ရှင် ဒေါက်တာ သန်းမင်းထွဋ်ကို တရားရုံးက စွဲချက်မတင်သေးခင် တရားလို ရဲအရာရှိဘက်က အမှုကို ပြန်လည်ရုပ်သိမ်းဖို့အတွက် တရားရုံးကို တင်ပြခဲ့တာလို့ ရှေ့နေ အသိုင်းဝိုင်းက ပုသိမ်မြို့နယ်တရားရုံးက အမှုလိုက်ရှေ့နေ့ တဦးက ပြောပါတယ်။
"အမှုက စွဲချက်မတင်ရသေးတဲ့အတွက် တရားရုံးက တရားရှင်လွှတ်လိုက်သည်ဆိုတဲ့ အမိန့်ချတာနဲ့ လွတ်ပါပြီ။ လွတ်ဖို့ကလည်း သေချာပါတယ်။”
ဇွန်လ ၃၀ ရက်နေ့က လွှတ်ပေးတဲ့အထဲမှာ ပင်းတယမီးအိမ်ရှင် ဒေါက်တာ သန်းမင်းထွဋ် ပါဝင်မယ်လို့ ပြောဆိုခဲ့ကြပေမယ့် ပြန်မလွတ်လာသေးတဲ့အပေါ် အရပ်သားတွေကို ဦးစားပေးလွှတ်တာဖြစ်ပြီး ဆရာကြီးက နောက်အသုတ်တွေမှာ ပါလာမယ်လို့ ဆိုပါတယ်။
ပထမအသုတ်အနေနဲ့ ဇွန်လ ၃၀ ရက်နေ့က ပြန်လွှတ်ပေးတဲ့အထဲမှာ ပုသိမ်မြို့က တိုင်းဧရာသတင်းထောက် မရွှေရည်ဝင်း၊ ပန်းချီ ဆရာ ဦးသက်နောင်တို့အပါအဝင် ၅၂ ဦး ပြန်လွတ်လာခဲ့ပါတယ်။
ပုသိမ်ပြည်သူ့ဆေးရုံအုပ်ကြီး ဒေါက်တာ သန်းမင်းထွဋ်ကို မတ်လ ၁၂ ရက်နေ့လယ်ပိုင်းမှာ အကြမ်းဖက်စစ်ကောင်စီလက်နက်ကိုင်တွေက ဖမ်းဆီးသွားပြီး တရားစွဲဆိုခဲ့တာလို့ သိရပါတယ်။
