စစ်ကိုင်းတိုင်း ကနီမြို့နယ်နဲ့ ယင်းမာပင်မြို့နယ်ဆက် တရော်ကျင်းတိုက်ပွဲမှာ စစ်ကောင်စီ တပ်ဘက်က အယောက် ၂၀ ထိခိုက်ကျဆုံးတယ်လို့ ပြည်သူကာကွယ်ရေးအဖွဲ့တွေဆီကနေ သိရပါတယ်။
ပြည်သူကာကွယ်ရေးအဖွဲ့ အကြီးအကဲတစ်ဦးက “တိုက်ပွဲအကျဆုံးကတော့ ကျနော်တို့ဘက်က ၂ ဦး ကျဆုံးကာ ၃ ဦး ထိခိုက်ဒဏ်ရာရတယ်ဗျ။ ဟိုစစ်ခွေးတွေဘက်ကတော့ ၂၀ ကျော်ကျဆုံးတယ်။ ကျနော်တို့ဘက်က ဒီကောင်တွေနဲ့ တိုက်ပွဲမဖြစ်အောင် လွတ်ရာကို ရှောင်တယ်။ ဒါပေမဲ့ဒီကောင်တွေက နယ်မြေရှင်းလင်းတယ်။ နယ်မြေရှင်းတယ်ပြောပြီး အပြစ်မဲ့ကျေးရွာသားတွေရဲ့ အိမ်တွေ၊ ပစ္စည်းတွေ ဖျက်ဆီးတယ်။ အခြေခံစားသောက်ကုန်တွေ ယူတယ်။ ပိုက်ဆံတွေ၊ ဒါအပြင် အဖိုးတန်ရွှေ ဒါတွေကိုပါ ယူတယ်။ အဲလိုမျိုး အပြစ်မဲ့ပြည်သူကို အနိုင်ကျင့် နှိပ်စက်နေတာကိုတော့ ကျနော်တို့က လက်ပိုက်ကြည့်မနေနိုင်ဘူး။ ဒါကြောင့် ဒီနေ့ ဒီကောင်တွေကို ချတာ” လို့ DVB ကို အတည်ပြုပြောဆိုပါတယ်။
ဒီနေ့ တိုက်ပွဲဖြစ်တဲ့ ယင်းမာပင်ခရိုင်အတွင်းက တရော်ကျင်းကျေးရွာကို စစ်ကောင်စီတပ်က တပ်ကူအဖြစ် လာရောက်တဲ့စစ်သားတွေဟာ တစ်ရော်ကျင်းမရောက်ခင် ဘန်ဘွေးအုပ်စု ထန်းဇန်တောပြင်လို့ လူသိများတဲ့ကျေးရွာက လူနေအိမ်အချို့ကို မီးရှို့တာတွေပြုလုပ်ပြီး တရော်ကျင်းရွာမှာလည်း နေအိမ်တစ်လုံး ထပ်မံမီးရှိုခဲ့တယ်လို့ ဒေသခံတွေက ပြောပါတယ်။
