CDM ကျောင်းဆရာ ၂ ဦးကို ဖမ်းမမိသဖြင့် မိသားစုဝင်များကို ရိုက်နှက်ဖမ်းဆီး
DVB
·
June 4, 2021
ပဲခူးတိုင်း၊ ပဲနွယ်ကုန်းမြို့အနီး ကျောင်းစိုးကျေးရွာမှာ ဇွန်လ ၃ ရက် ည ၁၁ နာရီလောက်က CDM ကျောင်းဆရာ ၂ ဦးကို ရဲတပ်ဖွဲ့ကလာရောက်ဖမ်းဆီးရာ မတွေ့တဲ့အတွက် မိသားစုဝင်တွေကို ဖမ်းဆီးခေါ်ဆောင်သွားပါတယ်။
ကျောင်းစိုးကျေးရွာက ဆရာနှစ်ဦးရဲ့ အဖေ၊ အမေနဲ့ ညီအပါအဝင် မိသားစုဝင် စုစုပေါင်း ၄ ဦးကို ဖမ်းဆီးသွားတာဖြစ်ပြီး အုပ်ချုပ်ရေးမှူးအပါအဝင် ကျေးရွာက ဒလန် သတင်းပေးတာကြောင့် အခုလိုဖမ်းဆီးခံရတာလို့ ဒေသခံတွေက ပြောပါတယ်။
ဖမ်းဆီးခေါ်ဆောင်စဉ် သေနတ်ပစ်ဖောက်တာနဲ့ မိသားစုဝင်တွေကို ရိုက်နှက်တာတွေရှိခဲ့တယ်လို့လည်း ဒေသခံတွေက ပြောပါတယ်။
ပြီးခဲ့တဲ့လကလည်း ပဲနွယ်ကုန်းမြို့မှာ သားဖြစ်သူကို မမိတာကြောင့် မိခင်ကို ဖမ်းဆီးခေါ်သွားခဲ့ပြီး ပုဒ်မ ၅၀၅ (က) နဲ့ အမှုဖွင့်တရားစွဲဆိုတာကြောင့် အမှုရင်ဆိုင်နေရပါတယ်။
