မိတ္ထီလာစက်မှုဇုန် အလယ်တန်းကျောင်း မီးလောင်
DVB
·
June 2, 2021
မန္တလေးတိုင်း၊ မိတ္ထီလာမြို့နယ်မှာ ဇွန်လ ၂ ရက်မနက် ၃ နာရီလောက်က မိတ္ထီလာစက်မှုဇုန် အလယ်တန်းကျောင်းထဲက ကျောင်းဆောင်တစ်ဆောင် မီးလောင်သွားတယ်လို့ စက်မှုဇုန်နေသူ တစ်ဦးက ပြောပါတယ်။
“ဘယ်လိုက ဘယ်လိုလောင်တယ်ဆိုတာတော့ မသိရသေးဘူး။ မနက် ၃ နာရီဝန်းကျင် လောက်က လောင်သွားတယ်။ စာသင်ခန်း ၄ ခန်းနဲ့ ဆရာ၊ ဆရာမများ နားနေခန်း တစ်ခန်းပါတဲ့ အဆောင်တစ်ဆောင် လောင်သွားတယ်။ မိတ္ထီလာမီးသတ်တပ်ဖွဲ့တွေ မီးငြှိမ်းပေးတယ်"လို့ ပြောပါတယ်။
မိတ္ထီလာစက်မှုဇုန် အလယ်တန်းကျောင်းထဲက အခန်း ၅ ခန်းပါ ဖိုးရာဇာအဆောင်တစ်ဆောင် မီးလောင်ဆုံးရှုံးသွားခဲ့ပါတယ်။
ကျောင်းရှေ့က အလံတိုင်ကိုလည်း ရိုက်ချိုးသွားပြီး ကျောင်းတက်ရင် ဗုံးခွဲမယ်လို့ မီးသွေးခဲနဲ့ စာရေးထားတာတွေ့ရတယ်လို့ ဆိုပါတယ်။ ဘာကြောင့် မီးလောင်ရတယ်ဆိုတာတော့ စုံစမ်း စစ်ဆေးနေဆဲလို့ သိရပါတယ်။
