စစ်ကောင်စီတပ်က ရေစကြိုဒေသခံနေအိမ်များကို ဝင်မွှေပြီး ပစ္စည်းများကို ဖျက်ဆီး
DVB
·
May 29, 2021
မကွေးတိုင်းဒေသကြီး ဟင်္သာကျေးရွာမှာ မေ ၂၉ ရက်နေ့ မနက်ပိုင်းက အကြမ်းဖက်စစ်ကောင်စီရဲ့ အဖွဲ့တွေ ဝင်ရောက်မွှေနှောက်ပြီး ပစ္စည်းတွေကို ဖျက်ဆီးသွားတယ်လို့ ဒေသခံတွေဆီကနေ သိရပါတယ်။
ဒလန်အုပ်ချုပ်ရေးမှူးက ရွာမှာ လက်နက်တွေရှိတယ်ဆိုပြီး တိုင်ကြားတာကြောင့် အကြမ်းဖက်စစ်သူပုန်ကား ၅ စီး အင်အား ၅၀ လောက်နဲ့ ရောက်လာပြီးတော့ NLD ပါတီဝင်တွေရဲ့ နေအိမ်တွေကို ဝင်ရောက်မွှေနှောက်ပြီးတော့ ပစ္စည်းတွေကို ရိုက်ချိုးဖျက်ဆီးသွားတယ်လို့ ဒေသခံတစ်ယောက်က DVB ကိုပြောပါတယ်။
ရွာထဲမှာ သေနတ်တွေပစ်ဖောက်ပြီးတော့ အော်ဟစ်ဆဲဆို သောင်းကျန်းတာကြောင့် ရွာသားတွေ ဘေးလွတ်ရာကို ထွက်ပြေးတိမ်းရှောင်နေရတယ်လို့ ဆိုပါတယ်။
စစ်ကောင်စီတပ်တွေဟာ ဒလန်အုပ်ချုပ်ရေးမှူးနဲ့ ပေါင်းပြီးတော့ NLD ပါတီဝင်တစ်ယောက်ရဲ့နေအိမ်မှာ သူတို့ပါလာတဲ့ လက်နက်တွေကိုချပြီးတော့ ဓာတ်ပုံရိုက်ပြီးယူသွားတယ်လို့ ဒေသခံတွေက ပြောပါတယ်။
