စစ်ကိုင်းတိုင်းဒေသကြီး၊ ရွှေဘိုမြို့နယ်၊ သီးလုံးကျေးရွာမှာ ဧပြီ ၂၉ ရက်နေ့ညက ရွာသားအချင်းချင်း ဓားခုတ်မှုဖြစ်ပွားခဲ့ပြီး ၂ ဦးသေဆုံးကာ ၇ ဦး ဒဏ်ရာရရှိခဲ့တယ်လို့ ရွာသားတွေဆီက သိရပါတယ်။
မနေ့က သီးလုံးကျေးရွာမှာ အကြမ်းဖက်စစ်တပ်တွေ ဝင်ရောက်လာပြီး ရွာသားတွေကို ဖမ်းဆီးသွားတာကြောင့် သတင်းပေးခဲ့သူတွေကို ရွာသားတွေကဖော်ထုတ်စဉ် အပြန်အလှန် ဓားခုတ်မှုဖြစ်ပွားပြီး ဒလန်သတင်းပေး ၂ ဦး သေဆုံးခဲ့ကာ ၇ ဦးဒဏ်ရာရရှိခဲ့တာလို့ ဒေသခံတွေက ပြောပါတယ်။
“အကြမ်းဖက်စစ်တပ်တွေ သီးလုံးကျေးရွာကိုရောက်လာခဲ့တယ်။ ကျေးရွာအုပ်ချုပ်ရေးမှူးကို လက်မခံတဲ့ ကျေးရွာသားတွေကို ဖမ်းဆီးပြီး လူနေအိမ်တွေကို ဖျက်ဆီးခဲ့တယ်။ အိမ်မှာရှိတဲ့ပစ္စည်းတွေ ယူဆောင်တယ်” လို့ ဒေသခံတစ်ဦးက ပြောပါတယ်။
သီးလုံးကျေးရွာနေပြည်သူတွေလည်း ထွက်ပြေးခဲ့ကြရပြီး ရွာမှာ တပ်စွဲထားတဲ့ အကြမ်းဖက်စစ်တပ်တွေ ပြန်လည်ထွက်ခွာသွားချိန်မှာ ကျေးရွာသူ ကျေးရွာသားတွေ ပြန်လည်ရောက်ရှိလာပြီးနောက် ဓားခုတ်မှုဖြစ်ပွားခဲ့တာပါ။
