ဖားကန့်အခြေစိုက် အလွတ်တန်းသတင်းထောက် ၁ ဦးကို စစ်တပ်က ဖမ်းဆီး
DVB
·
April 9, 2021
ကချင်ပြည်နယ် ဖားကန့်မြို့မှာ နေထိုင်တဲ့ အလွတ်တန်းသတင်းထောက် ကိုနောင်ရိုးကို
ဧပြီ ၉ ရက် မနက် ၉ နာရီကျော်က စစ်တပ်က ဖမ်းဆီးသွားတယ်လို့ သိရပါတယ်။
“ဒီနေ့မနက် ဆန္ဒပြပွဲ သတင်းယူဖို့ထွက်သွားတာ၊ ဖားကန့်မြို့အဝင်ပန်းတင်တံတားနားမှာ စစ်တပ်က ဖမ်းတာလို့ပြောတယ်။ အခု ဖားကန့်မြို့မရဲစခန်းမှာ ကိုယ်ရေးအချက်အလက်နဲ့ ဖုန်းတွေကိုစစ်ဆေးဖို့လုပ်နေတယ်လို့ သိရပါတယ်”လို့ မြို့ခံ တခြားသတင်းထောက် တစ်ဦးက ပြောပါတယ်။
ကချင်ပြည်နယ်အတွင်းမှာ စစ်တပ်အာဏာသိမ်းပြီးနောက် ဧပြီ ၉ ရက်နေ့ အထိဖမ်းဆီးခံရတဲ့ သတင်းထောက်စုစုပေါင်း ၉ ယောက်ရှိကာ ၆ ယောက်ကို ပြန်လွှတ်ပေးခဲ့ပြီး မြစ်ကြီးနားမြို့က သတင်းထောက် ၂ ယောက်ကိုတော့ ပုဒ်မ ၅၀၅ (က) နဲ့တရားစွဲဆိုထားတာပါ။
