ထိုင်းနိုင်ငံဘက်ကို တရားမဝင် ဖြတ်ကျော်ဝင်ရောက်ခဲ့တဲ့ မြန်မာနိုင်ငံသား ၁၆ ယောက်ကို ကင်းလှည့်စစ်တပ်က ဖမ်းမိခဲ့တယ်လို့ ဘန်ကောက်ပို့စ်သတင်းမှာ ဖော်ပြပါတယ်။
ဖမ်းမိခဲ့သူတွေထဲမှာ အမျိုးသား ၁၀ ယောက်နဲ့ အမျိုးသမီး ၆ ယောက်ပါဝင်ပြီး ဆန်ခလာဘူရီခရိုင်ထဲက ဝါးတောတခုထဲမှာ မတ် ၂၇ ရက်ည ၆ နာရီခွဲလောက်က ဖမ်းမိ ခဲ့တာလို့ ဗိုလ်မှူးကြီး ချလမ်ပိုလ် ဆန်တန်က ဆိုပါတယ်။
စစ်ဆေးမေးမြန်းမှုတွေ လုပ်ခဲ့ချိန်မှာတော့ သူတို့ဟာ မြန်မာအလုပ်ပွဲစားတွေက တဆင့် ဖုန်းအဆက်အသွယ်လုပ်ခဲ့ကြပြီး ခုလိုလာရောက်ခဲ့ကြတာဖြစ်တယ်လို့ ဆိုပါတယ်။
တောထဲမှာ ပုန်းနေပြီး သူတို့ကို လာရောက်ခေါ်ဆောင်မယ့် သူတွေကို စောင့်ဆိုင်း နေချိန်မှာ ဖမ်းဆီးခံခဲ့ရတာဖြစ်ပြီး သူတို့ထဲက ၅ ယောက်က ချောင်ဘူရီ၊ ၄ ယောက်က ဆမွတ်စာခွန်၊ ၃ ယောက်က ဘန်ကောက်၊ ၃ ယောက်က ရက်တ်ချဘူရီနဲ့ ၁ ယောက်က ဆမွတ်ပရာကန်ဒေသတွေဆီ သွားရောက်ကြမှာဖြစ်တယ်လို့ ဆိုပါတယ်။
သူတို့ဟာ အဆိုပါဒေသတွေဆီအရောက် ပွဲစားခ တယောက်ကို ဘတ်ငွေ ၁၄,၀၀၀ ကနေ ၁၇,၀၀၀ ကြားပေးရမှာ ဖြစ်တယ်လို့ ဝန်ခံထွက်ဆိုထားပါတယ်။ လတ်တလောမှာတော့ သူတို့ ၁၆ ယောက်ကို ဆန်ခလာဘူရီဆေးရုံကို ပို့ဆောင်ကာ လိုအပ်တဲ့ ဆေးစစ်ဆေးမှုတွေလုပ်ဆောင်နေပြီး တရားမဝင် ဝင်ရောက်မှုအတွက် ဥပဒေအရ အရေးယူမှုတွေ ဆက်လက်လုပ်ဆောင်သွားမယ်လို့ ထိုင်းသတင်းမှာ ဖော်ပြပါတယ်။
