ရန်ကုန်၊ တာမွေမြို့နယ်၊ ကျောက်မြောင်းမှာ  ရဲနဲ့ စစ်တပ်က  ဖေဖေါ်ဝါရီ ၂၅ ရက်နေ့ ညနေပိုင်းမှ စတင်ကာ လက်နက်အပြည့်အစုံ အင်အားအလုံးအရင်းနဲ့ ဝင်ရောက် စီးနင်း သေနတ်နဲ့ ပစ်ခတ်ပြီး ဆန္ဒပြ ပြည်သူတွေကို ဖမ်းဆီးခဲ့ပါတယ်။

ကျောက်မြောင်းကြီးရပ်ကွက်နဲ့ ဘိုးလိန်းအောင်မင်္ဂလာ ရပ်ကွက်တို့မှာ  အာဏာသိမ်းစစ်ကောင်စီခန့်အပ်တဲ့ အုပ်ချုပ်ရေးမှူးတွေကို ကန့်ကွက် ဆန္ဒပြတဲ့ ပြည်သူတွေကို အောင်မင်္ဂလာလမ်းနဲ့ နှင်းဆီလမ်းထောင့်မှာ ဒီကနေ့ ညနေ ၅ နာရီ ၄၅ မိနစ်လောက်မှာ တစ်ကြိမ်ပစ်ခတ်မှုတွေ ပြုလုပ်ခဲ့ပါတယ်။

ည ၇ နာရီလောက်မှာတော့ လက်နက်နဲ့ ဒိုင်းတွေကိုင်ဆောင်ထားတဲ့ ရဲလုံခြုံရေး တပ်ဖွဲ့တွေက အောင်မင်္ဂလာလမ်းအတိုင်းဝင်ရောက်လာပြီး လူမရှိတော့တဲ့လမ်းပေါ်မှာ သေနတ် ပစ်ခတ် ခြိမ်းခြောက်မှုတွေလည်း ပြုလုပ်ခဲ့ပါတယ်။

​ရဲတပ်ဖွဲ့ရဲ့ ပစ်ခတ်မှုကြောင့် လူတွေထိခိုက်ဒဏ်ရာရတာတွေ မရှိပေမဲ့   လူအတော်များများ အဖမ်းခံရနိုင်တယ်လို့ ရပ်ကွက်နေ ဒေသခံတွေက ခန့်မှန်းနေကြပါတယ်။

ဖမ်းဆီးခံရသူ အရေအတွက် အတိအကျမသိရပေမဲ့ အောင်မင်္ဂလာကားမှတ်တိုင်မှာ ကားရပ်​စောင့်​နေတဲ့ ခရီးသည် ၁၅​ ယောက်​လောက်နဲ့ တခြားသူ ၁၀​ ယောက်​လောက် ဖမ်းဆီးခံရတယ်လို့  အနီးနားပတ်ဝန်းကျင်​နေသူ​တွေက ဒီဗွီဘီကို​ပြောတယ်။

ဒီကနေ့ ည ၁၁ နာရီလောက်အထိ ရဲနဲ့ စစ်တပ်တွေ  ယုဇနပလာဇာလမ်းဆုံမှ စတင်ကာ   ဗညားဒလမ်းမကြီးပေါ်မှာ အောင်မင်္ဂလာလမ်းထိပ်၊ သီတာလမ်းထိပ်တွေမှာ ပိတ်ဆို့တပ်ချထားပြီး ရပ်ကွက်နေ ဒေသခံပြည်သူတွေကတော့ ညဘက် အိမ်​တွေကို ဝင်ရောက် ဖမ်းဆီးမှာကို စိုးရိမ်နေကြပါတယ်။

အခုရက်ပိုင်းအတွင်း စစ်အာဏာရှင်ကိုဆန့်ကျင်တဲ့ ပြည်သူလူထုတွေကို  ရဲတပ်ဖွဲ့က အင်အားသုံးဖြိုခွင်းတာ​တွေ နယ်​ဒေသ​တွေအပြင် ရန်ကုန်မှာပါ​တွေ့လာရပြီး ဖမ်းဆီးတာ​တွေလည်း ရှိလာပါတယ်။

Photo - JPaing / MPA